Urukiko Rwisumbuye rwa Nyarugenge rwemeje ko Ubujurire bw’Ubushinjacyaha mu rubanza ruregwamo Umushumba w’Itorerero Zeraphat Holy Church, Bishop Harerimana Jean Bosco, nta shingiro bufite, rutegeka ko akomeza gukurikiranwa ari hanze.

Sponsored Ad

Urukiko rw’Ibanze rwa Kicukiro rwari rwategetse ko Bishop Harerimana Jean Bosco n’umugore we bafungurwa by’agateganyo bagakurikiranwa badafunzwe ariko Ubushinjacyaha bujuririra icyo cyemezo busaba ko Bishop Harerimana yakurikiranwa afunzwe.

Ni ubujurire bwari bwatanzwe n’Ubushinjacyaha nyuma yo kutanyurwa n’umwanzuro w’Urukiko rw’Ibanze rwa Kicukiro rwamurekuye by’agateganyo.

Bishop Harerimana yari yatawe muri yombi n’umugore we bakurikiranyweho ibyaha birimo kwihesha ikintu cy’undi hakoreshejwe uburiganya, gukangisha gusebanya no gukwirakwiza amafoto y’imikoreshereze y’ibitsina.

Urubanza mu bujurire rwakomereje mu muhezo kubera impamvu zishingiye ku miterere yarwo n’ibivugwamo bishobora kubangamira imico mbonezabupfura.

Icyemezo cy’urukiko cyatangajwe kuri uyu wa 21 Ugushyingo 2024

Rwemeje ko Ubujurire bw’Ubushinjacyaha nta shingiro bufite.

Rwategetse ko icyemezo cy’Urukiko rw’Ibanze rwa Kicukiro kidahinduka.