Inzego z’ubuzima mu Rwanda ziratangaza ko mu byumweru bibiri bishize abandura covid19 biyongereye ku gipimo kingana na 275%, ku buryo nta gikozwe mu maguru mashya ibintu bishobora gusubira irudubi ndetse hagafatwa ingamba zikomeye.

Sponsored Ad

Ni muri urwo rwego ku ikubitiro Akarere ka Rubavu kashyizwe muri gahunda ya Guma mu karere, ndetse abatuye umujyi wa Kigali nabo baraburirwa.

Hashize icyumweru gisaga imibare y’abandura icyorezo cya COVID19 mu Rwanda yongeye kuzamuka mu buryo bugaragara.

Mu bice byibasiwe n’iki cyorezo kurusha ibindi harimo akarere ka Rubavu kashyizwe muri gahunda ya Guma mu karere kuva kuri uyu wa kane.

Minisitiri w’ubutegetsi bw’igihugu Gatabazi Jean Marie Vianney avuga ko gushyira Rubavu muri Guma mu karere, binatanga ubutumwa no ku bindi bice by’igihugu by’umwihariko Umujyi wa Kigali.

Isesengura ryakozwe n’inzego z’ubuzima mu Rwanda ryerekana ko mu byumweru bibiri bishize, imibare y’abadura COVID19 yikubye hafi 3 ndetse Akarere ka Rubavu kakaba ari ko kibasiwe kurusha ahandi kagakurikirwa n’aka Rutsiro.

Umuyobozi mukuru w’ikigo cy’igihugu cy’ubuzima RBC, Dr. Sabin Nsanzimana avuga ko nta gikozwe mu maguru mashya iki kibazo gishobora gufata indi ntera.

Ikindi ni uko mu bamaze guhabwa urukingo rwa COVID-19 hamaze kuboneka 400 banduye, inzego z’ubuzima zikavuga ko nubwo nta n’umwe muri bo wagize ikibazo cyangwa ngo agaragaze ikimenyetso na kimwe, bishoboka ko abo nabo banduje abandi batari bake.

Kubera ko imibare y’abarwayi ikomeje kwiyongera, ibigo binini birimo Kanyinya na Gatenga byari bimaze hafi amezi 4 bifunze byongeye gufungurwa, kuko ibitaro bya Nyarugenge bigeze hafi kuri 65% by’ubushobozi bifite bwo kwakira abarwayi.

Gusa umunyamabanga wa leta muri minisiteri y’ubuzima Dr. Mpunga Tharcisse avuga ko guca intege iki cyorezo bigishoboka.

Nubwo nta bwoko bushya bwa COVID19 buragera mu Rwanda, inzego z’ubuzima zirasaba buri wese kuba maso kuko nk’iyitwa delta yandura ikanica ku muvuduko ukubye 4 COVID19 isanzwe yamaze kugera mu bihugu by’abaturanyi.

Source:RBA