Mu Rwanda mu minsi ibiri ishize hafashwe ibipimo byinshi bya Covid-19 cyane cyane mu mujyi wa Kigali, ubu birerekana ko hafi 4% by’abapimwe banduye iki cyorezo.

Sponsored Ad

Umurwa mukuru Kigali n’utundi turere umunani uyu munsi batangiye umunsi wa gatatu mu minsi 10 bagomba kumara mu ngo zabo.

Minisiteri y’ubuzima ivuga ko ishaka gupima nibura 15% by’abatuye buri kagali muri ibyo bice biri muri guma mu rugo ngo igire ishusho y’uko icyorezo gihagaze.

Kuwa gatandatu no ku cyumweru hafashwe ibipimo byose hamwe 124,488 basanga abanduye ari 4,770 bangana na 3,8%.

Ku cyumweru hafashwe ibipimo birenga 70,000 nibwo bwa mbere hari hafashwe byinshi ku munsi, hanaboneka abanduye barenga 2,700 ari nabo benshi babonetse ku munsi umwe kugeza ubu.

Mu basanganywe COVID-19 kuri iki cyumweru, abenshi biganje muri Kigali ahasanzwe 2.225. Muri Musanze habonetse 47, Burera ni 44, Kamonyi ni 42 mu gihe mu Turere twa Gisagara, Nyaruguru na Bugesera nta bwandu bushya bwahabonetse.

Abantu bashya bakize ku cyumweru ni 1,855, batumye abamaze gukira bagera ku mpuzandengo ya 69%. Ni mu gihe abakirimo kwitabwaho n’abaganga yaba mu bitaro cyangwa mu ngo bagera ku 16,632 barimo 72 barembye.

Abantu 11 nibo bishwe n’icyo cyorezo kuri iki cyumweru, barimo abagore batanu b’imyaka 75 (Rulindo), 71, 66 (Kigali), 69 (Rubavu) & 69 (Rusizi) n’abagabo batandatu b’imyaka 71 (Rulindo), 69, 60, 57 (Kigali) 62 (Huye) & 50 (Karongi).

Abashinzwe ubuzima bavuga ko mu mpamvu zo kwiyongera kw’abanduye n’abapfa harimo ubwoko bushya bw’iyi virus buzwi nka Delta bwandura vuba kandi bwica kurusha andi moko.

Inzego z’Ubuzima ziraburira abaturarwanda kwitwararika kuko mu Gihugu hageze ubwoko bwa COVID-19 yihinduranyije bwitwa Delta bugize 60% y’ubwandu bushya, bukaba bwandura vuba kandi bugatuma abantu banaremba vuba ndetse bamwe bakagira n’ibyago byinshi byo kubura ubuzima.

Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.