skol
Kigali

Abantu 5 bahitanwe na Covid-19 mu Rwanda abandi 884 barayandura

Amakuru   Yanditswe na: Dusingizimana Remy 2 July 2021

Minisiteri y’Ubuzima yatangaje ko uri uyu wa Gatanu,abantu 5 bahitanwe na Covid-19 bituma abamaze gupfa bose bagera kuri 453.Abapfuye n’abagore batatu b’imyaka 76 (i Rubavu), 57 (i Kigali) & 31 (i Muhanga) n’abagabo babiri b’imyaka 73 (i Huye) na 49 (i Kigali).


Habonetse abarwayi bashya 884 ba COVID-19 mu Rwanda bituma abamaze kwandura bose baba 40,798.Nta murwayi mushya wakize.Abakirwaye bageze ku 13,073 barimo 43 barembye.

Abantu 251,350 bamaze guhabwa doze ya kabiri y’urukingo rwa COVID-19 (AstraZeneca) barimo 211 bayihawe uyu munsi.

Inzego z’ubuzima mu Rwanda ziravuga ko kuva icyorezo cya COVID-19 cyagera mu Rwanda, ukwezi gushize kwa Gatandatu ariko kwabaye kubi kurusha ikindi gihe, ari nayo mpamvu guverinoma ivuga ko mu gihe ingamba ziriho zitatanga umusaruro wifuzwa na Guma mu rugo ishobora kugaruka.

Hagendewe ku mibare ya buri munsi y’abandura n’abahitanwa n’icyorezo cya COVID-19 mu Rwanda, usanga ukwezi gushize kwa Kamena kwarabonetsemo abanduye bashya n’abahitanwa n’icyorezo cya COVID-19 kurusha ikindi gihe.

Imibare y’inzego z’ubuzima igaragaza ko muri Kamena igipimo cy’ubwandu cyavuye kuri 1.4% cyigera kuri 8.8%, kuko abanduye bavuye ku 27 023 tariki ya 1 bagera ku 39 047 tariki 30, bivuze ko mu minsi 30 gusa habonetse abagera ku 12 024 banduye COVID19.

Ni mu gihe kandi muri uko kwezi konyine iki cyorezo cyahitanye abagera kuri 81.

Minisitiri w’ubuzima Dr. Daniel Ngamije avuga ko igiteye impungenge kurushaho, ari ubwiyongere bw’abarwayi bagaragaza ibimenyetso ndetse bikarangira bagiye mu bitaro bitandukanye n’uko byahoze mbere, aho wasangaga 10% gusa ari bo bagaragaza ibimenyetso.

Yagize ati: “Abenshi bageze kuri 50% bari kwisuzumishiriza mu bigo nderabuzima, mu bitaro no mu mavuriro yigenga. Ni ukuvuga ngo ava mu rugo afite ikibazo gituma ajya kwisuzumisha. Igikurikira rero ni uko n’umubare w’abinjijwe mu bitaro muri iyi minsi nawo wagiye wiyongera.”

“Iyo urebye imibare ukuntu yagiye izamuka muri uku kwezi kose kwa Kamena nk’aho tuvurira abantu COVID19 mu bitaro bya Nyarugenge, usanga dutangira ukwezi kwa Gatandatu twari dufite abarwayi badasaga 20, uyu munsi wa none dufiteyo abarwayi basaga 127. Iyo bagezemo nabwo rero abenshi turi kubona bakeneye umwuka. Umwuka twakoreshaga nawo muri biriya bitaro umuntu arabona ko ibipimo byiyongereye inshuro zigeze ku 10.”

“[…] Icya nyuma ni abapfa bazize COVID-19, ntabwo twaherukaga imibare y’abantu 7, 8, 9 bapfuye ku munsi noneho wanasesengura ugasanga mu bapfuye harimo abantu bakiri bato harimo nk’abantu bafite imyaka 40, 39 kandi nta kindi kibazo cy’ubuzima yari asanganywe ngo uvuge ko COVID-19 yaje kumuhuhura kuko yari asanzwe afite ibibazo by’ubuzima. Ibyo byose iyo umuntu abirebeye hamwe ikibazo cya COVID-19 kirakomeye.”

Ugereranyije ukwezi kwa 6 n’amezi 2 yakubanjirije, usanga harimo ikinyuranyo kinini, kuko nko mu kwa kane habonetse abanduye 3 198, mu kwa 5 haboneka 1 738, bivuze ko muri ayo mezi yombi habonetse 4 936 bangana na 41% gusa y’ababonetse mu kwezi kwa 6 konyine.

Ni mu gihe kandi abapfuye muri ayo mezi yombi ari 45 bangana na 55% by’abapfuye muri Kamena.

Inzobere mu ndwara z’ibyorezo akaba anakora mu ishami ry’umuryango w’abibumbye ryita ku buzima mu Rwanda Dr. Vedaste Ndahindwa avuga ko kuva iki cyorezo cyakwaduka mu Isi, u Rwanda atari cyo gihugu cya mbere gihuye n’iki kibazo.

Ati: “Ngirango mu Rwanda tumaze kubona ko ubu Kigali turimo kugera ku mibare tutigeze tugira mbere ariko ntitwavuga ko ari ubwa mbere habonetse imibare myinshi ku Isi, hari ibihugu bibona ibihumbi Magana ku munsi. Ariko ku bwacu ni imibare iri hejuru cyane, iteye inkeke kandi tutakwifuza ko ikomeza kwiyongera.”

Ni na yo mpamvu mu kwezi kwa 6 ingamba zo guhangana n’iki cyorezo zavuguruwe inshuro zigera kuri 4 zose, amasaha yo kugera mu rugo ava saa yine z’ijoro ashyirwa saa kumi n’ebyiri ndetse hashyirwaho na gahunda ya Guma mu karere.


Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Kayonza: Umuryango "AMAHORO HUMAN RESPECT" wahuguye urubyiruko rufite...

Kuwa 21 Ukwakira 2021, Umuryango AMAHORO HUMAN RESPECT washinzwe n’Umuhanzi...
21 October 2021 0

Rubavu:Akarere n’abaturage barasobanya ku kiraro cyangiritse kigahagarika...

Bamwe mu babyeyi barerera mu ishuri rishya ryubatswe mu Kabirizi mu murenge...
21 October 2021 0

Nyarugenge: “Sinahora mfungisha abagabo”, ubuhamya bw’umwangavu watewe inda...

Umukobwa wo ku Muhima avuga ko yatewe inda kabiri ataruzuza imyaka 18,...
21 October 2021 0

MINALOC yakomoreye abana kugaruka mu nsengero mu mabwiriza mashya...

Minisiteri y’Ubutegetsi bw’Igihugu yasohoye amabwiriza mashya agenga...
20 October 2021 0

Urujijo ku miryango yasigaye ahahoze inkambi ya Gihembe yafunzwe

Mu gihe kuwa mbere w’iki Cyumweru Leta y’u Rwanda yafunze ku mugaragaro...
20 October 2021 0

Ngororero: Umurambo wataburuwe ushyingurwa na ba nyirawo nyuma yo guhabwa...

Umuryango wo mu Murenge wa Gatumba mu Karere ka Ngororero washyinguye...
19 October 2021 0