Minisiteri y’Ubuzima yatangaje ko ku munsi wa mbere w’iki gikorwa hakingiwe abantu 75,056. Biteganyijwe ko iki gikorwa gikomeza kuri uyu wa Gatandatu.

Sponsored Ad

Mu bahawe urukingo harimo 2.051 bo mu Mujyi wa Kigali, 15.007 bo mu Majyaruguru, 21.812 bo mu Majyepfo, u Burasirazuba bufite 20.072 mu gihe u Burengerazuba hakingiwe 16.114.

Mu kiganiro yaraye agiranye na RBA,Minisitiri w’Ubuzima,Dr Ngamije Daniel yagize ati " Uru rukingo ni rwo ruzadusubiza ku murongo tugasubira mu buzima busanzwe."

Minisitiri Ngamije yavuze ko hari gukoreshwa ikoranabuhanga muri iki gikorwa cyo gukingira aho bifasha kubika neza amakuru akazakoreshwa igihe cyose yakenerwa.

Yavuze ko muri rusange gahunda yo gukingira yagenze neza, gusa ngo mu Karere ka Ruhango hari abantu bari bagaragaje imyumvire inyuranye ku nkingo, gusa ngo baje gusobanurirwa neza, bemera gukingirwa.Yaboneyeho gusaba abantu kwirinda ibihuha bivuga nabi izi nkingo.

Nubwo abaturarwanda batangiwe gukingirwa, bakomeza kugirwa inama yo gukomeza kwirinda no kubahiriza amabwiriza yashyizweho n’inzego z’ubuzima.

Abanyarwanda bagirwa inama yo gukomeza kubahiriza amabwiriza yashyizweho, bibuka kwambara agapfukamunwa buri gihe bavuye mu ngo, bakaraba intoki kenshi, birinda amakoraniro n’ibindi bintu byose bishobora guhuriza hamwe abantu benshi.

Muri rusange inkingo zose zimaze kugera mu Rwanda ni ibihumbi 397, ziri mu byiciro bitatu birimo 102.960 za Pfizer n’izigera kuri 240.000 za AstraZeneca zanyujijwe muri gahunda ya Covax yo gufasha ibihugu biri mu nzira y’iterambere, ndetse n’izindi 50.000 za AstraZeneca zatanzwe na Leta y’u Buhinde.

Leta y’u Rwanda yihaye umuhigo wo gukingira 60% by’abaturarwanda bose mbere y’uko umwaka wa 2022 urangira. Leta y’u Rwanda ikomeje ibiganiro n’ibindi bihugu, abakora inkingo ndetse n’abafatanyabikorwa batandukanye kugira ngo haboneke inkingo zihagije.

Mu itangazo risohoka buri munsi ryerekana uko icyorezo cya COVID-19 giterwa na Coronavirus gihagaze, Minisante yaraye itangaje ko umuntu umwe ari wahitanywe nacyo kuri uyu wa Gatanu.

Uwo mugabo w’imyaka 40 witabye Imana mu Mujyi wa Kigali yatumye umubare w’abamaze kwicwa na Coronavirus mu gihugu uba 267.

Mu bipimo 4.534 byafashwe kandi hagaragaye abarwayi 92 bashya bituma umubare w’abamaze kwandura bose ungana na 19.426. Umubare w’abamaze gusezererwa kwa muganga na wo wiyongereyeho 69 bagera kuri 17.751.

Abakirwaye ni 1.418 mu gihe 11 barembye. Ibipimo bimaze gufatwa guhera muri Werurwe 2020 ubwo Coronavirus yaboneka mu Rwanda bingana na 1.029.747.

Abakingiwe bose mu turere dutandukanye