Akarere ka Musanze katangaje ko kahagaritse ibikorwa byo kwakira abaturage bari basanzwe bakagana bashaka serivisi zitandukanye ko byahagaritswe mu rwego rwo kwirinda COVID-19.

Sponsored Ad

Ku gicamunsi cyo kuri uyu wa kabiri taliki 28 Nyakanga 2020,nibwo aka karere katangaje ko serivisi zose katangiraga ku biro zihagaritswe keretse abazajya bifashisha ikoranabuhanga bazisaba

Iri tangazo kandi rivuga ko inyandiko zose zajyaga zishyikirizwa Akarere nazo zitazongera kwakirwa hatifashishijwe ikoranabuhanga.

Ibikubiye mu itangazo byose nta gihe kizwi cyatangajwe bizamara ahubwo ryerekana ko bigamije gushyira mu bikorwa amabwiriza yo kwirinda icyorezo cya COVI-19.

Kuwa 27 Nyakanga 2020, Minisiteri y’Ubuzima yatangaje ko mu bantu 58 basanganywe ubwandu bwa COVI-19, umwe muri bo yari uwo mu Karere ka Musanze.

Iri tangazo ry’Akarere ka Musanze rikomeza rivuga ko abafite ibibazo bitandukanye bishingiye kuri serivisi zitangwa n’Akarere guhamagara umurongo wa telefoni itishyurwa 4042 (toll free), cyangwa bakandikira akarere hakoreshejwe ikoranabuhanga rya interineti kuri e mail: [email protected].

Ubuyobozi bw’Akarere ka Musanze bwahumurije abaturage ko nta gikuba cyacitse ahubwo ari uburyo bwo kurushaho gushyira mu bikorwa amabwiriza yo kwirinda COVID-19.

Ibi bihe bidasanzwe byo guhagarika serivisi zimwe na zimwe mu Karere ka Musanze byaherukaga kuwa 14 Kamena 2020, ubwo Hoteli ebyiri na Lodge zahagarikiwe serivisi nyuma y’uko hari abantu batanu bagaragaweho n’ubwandu bwa COVID-19 kandi barazinyuzemo ziza gukomorerwa nyuma yo gupima abakozi bazo bose bikagaragara ko ntawanduye COVID-19.