skol
Kigali

Bwa mbere mu Rwanda abantu barenga 900 banduye Covid-19 abandi 5 irabahitana

Amakuru   Yanditswe na: Dusingizimana Remy 24 June 2021

Minisiteri y’Ubuzima mu Rwanda yatangaje ko kuri uyu wa Gatatu tariki 23 Kamena 2021, mu Rwanda habonetse abantu 964 babasanzemo Covid-19, muri bo 326 bakaba babonetse i Kigali. Abakize ni 22, abantu batanu bitabye Imana, naho abarembye ni 12 nk’uko imibare yatangajwe ibigaragaza.


Abitabye Imana ni abagabo batatu b’imyaka 70, 65, 63, umugore w’imyaka 43 bose b’i Kigali, hamwe n’umugabo w’imyaka 68 (i Huye).Abantu 397 nibo bamaze kwicwa n’iki cyorezo mu Rwanda.

Abantu 247,666 bamaze guhabwa doze ya kabiri y’urukingo rwa #COVID19 (AstraZeneca) barimo 264 bayihawe ku wa Gatatu.

Imibare y’abandura ikomeje gutumbagira, by’umwihariko kuri uyu wa Gatatu bikaba bibaye ubwa mbere mu Rwanda habonetse abanduye benshi ku munsi umwe (964). Ni mu gihe mbere yaho ku wa Kabiri tariki 22 Kamena hari habonetse abanduye bashya 861, uyu mubare na wo ukaba wari hejuru kurusha indi yabonetse mu minsi ishize ku munsi umwe n’ubwo na yo yari hejuru kurusha iyabonetse mu bihe bishize kuva iki cyorezo cyagera mu Rwanda.

Ubwiyongere budasanzwe bw’iyi mibare buri mu byatumye Inama y’Abaminisitiri idasanzwe iterana tariki 21 Kamena 2021, ikaba yarafatiwemo ibyemezo bikomeye bigamije guhangana n’icyi cyorezo.

Inzego zishinzwe ubuzima zisaba Abaturarwanda baba abakingiwe n’abatarakingirwa gukomeza kwitwararika birinda kwandura cyangwa kwanduza abandi icyorezo cya COVID-19, dore ko gikomeje kugaragaza ubukana mu Rwanda n’ahandi ku isi.

Umuyobozi wa RBC, Dr Sabin Nsanzimana, yabwiye TV1 ko abarwayi batatu bahitanywe na Covid-19 bari baranduye indwara zikomeye zirimo kanseri.

Yagize ati “Hari abantu batatu bahawe urukingo rwa Covid-19 bitabye Imana ariko nta gikuba cyacitse kuko bari basanzwe bafite uburwayi bukomeye. Urugero umwe muri bo yari afite kanseri yo ku gipimo cyo hejuru, undi nawe yari afite indwara y’umutima.’’

Yasobanuye ko urukingo ruha umubiri w’uwaruhawe ubudahangarwa kuri Covid-19 ariko ntirwamubuza guhitanwa nayo.

Yakomeje ati “Ntitwavuga ko bahitanywe nayo kuko izo ndwara zari zibarembeje.’’

Dr Nsanzimana yavuze ko abantu bakwiye gukomeza kubahiriza amabwiriza yo kwirinda kuko guhabwa urukingo bidakuraho ko umuntu yakwandura cyangwa ngo yanduze mugenzi we.

Ati “Twagaragaje imibare ko abantu 400 bakingiwe Covid-19 banduye, icyo bahuriyeho bose ntibaremba, icyiciro cyabo kinini bari barafashe urukingo rwabo rwa mbere bategereje urwa kabiri. Guhabwa urukingo rwa kabiri kandi ntibiguha ubudahangarwa ijana ku ijana ko Covid-19 utahura nayo, nta rukingo rwizewe ijana ku ijana turabona ku buryo abantu bakwirara.”

Yasabye abadohoka ku mabwiriza yo kwirinda ikwirakwira rya Covid-19 bagatera ishoti ibyo kwambara agapfukamunwa bitwaje ko bakingiwe kwitwararika kuko bashobora kwandura no kwanduza abandi nubwo nta bimenyetso bagaragaza cyangwa ngo barembe.


Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Covid-19: Abakuze mu Rwanda batangiye guterwa doze ‘ya gatatu’ y’urukingo...

Abagejeje ku myaka 50 mu Rwanda batangiye guhabwa doze ya gatatu y’urukingo...
30 November 2021 0

U Rwanda rwakiriye inkura zera 30 zivuye muri Africa y’Epfo

Inkura 30 zera zinjijwe mu cyanya cy’inyamaswa cy’Akagera zivanywe muri...
29 November 2021 0

MINISANTE yahishuye umwanzuro wafashwe ku bagenzi binjira mu Rwanda...

Mu rwego rwo gukumira ikwirakwira ry’ubwoko bushya bwa COVID-19 biswe...
29 November 2021 0

U Rwanda rwasubijeho itegeko ryo kwishyira mu kato ku bantu baturutse mu...

Kubera ubukana bw’ubwoko bushya bwa Covid-19 bwagaragaye muri Afurika...
27 November 2021 0

U Rwanda rugiye kohereza muri Qatar abakozi bazanafasha mu gikombe...

Kaminuza yigisha iby’ubukerarugendo mu Rwanda imaze gusinya amasezerano yo...
27 November 2021 1

Perezida Kagame yagiriye urugendo muri RDC [AMAFOTO]

Perezida wa Repubulika,Paul Kagame yageze i Kinshasa kuri uyu wa Kane,...
25 November 2021 0