skol
fortebet

Covid-19 yahitanye abagore 3 mu Rwanda abandi 296 barayandura

Yanditswe: Sunday 20, Jun 2021

featured-image

Sponsored Ad

Minisiteri y’Ubuzima yatangaje ko kuri iki Cyumweru, abantu batatu bahitanywe na COVID-19 mu Rwanda bituma umubare w’abamaze kwicwa n’iki cyorezo ugera kuri 382.Abahitanwe n’iki cyorezo n’abagore batatu b’imyaka 75, 54 na 42 bo mu mujyi wa Kigali.

Sponsored Ad

Abantu bashya banduye iki cyorezo mu Rwanda ni 296 mu gihe hakize 126.Umujyi wa Kigali wabonetsemo abanduye benshi bagera kuri 166.Abakirimo kwitabwaho n’abaganga ni 3,727 barimo 11 barembye.

Abantu 246,789 bamaze guhabwa doze ya kabiri y’urukingo rwa COVID-19 (AstraZeneca) barimo 251 bayihawe uyu munsi.

Raporo ngarukamunsi ya Minisiteri y’Ubuzima ku miterere ya COVID-19 yerekana ko uhereye ku wa 19 Mata kugeza ku wa 19 Kamena 2021, imibare y’abandura n’abahitanwa n’iki cyorezo yatumbagiye cyane.

Usubije amaso inyuma muri ayo mezi abiri ashize, uwo munsi habonetse abantu 46 banduye iki cyorezo giterwa na Coronavirus mu bipimo 3605 byari byafashwe.

Umubare w’abakize kuri uwo munsi wari 167, mu gihe umwe ari we wahitanwe na Coronavirus. Muri rusange abari bamaze gusanganwa iki cyorezo kuva cyagera mu Rwanda muri Werurwe 2020 bari 23.934 mu bipimo 1.260.524 byari bimaze gufatwa mu gihe 326 bari bamaze guhitanwa nacyo.

Muri iki gihe, Covid-19 yongeye kuzamuka bikabije aho umubare w’abayandura, abakenera ubuvuzi buhambaye bwo gushyirwa ku mashini zibongerera umwuka babaye benshi.

Mu mezi abiri gusa, umubare w’abanduye Covid-19 wiyongereyeho 6583 mu bipimo 283.800, wavuye kuri 23.934 ugera kuri 30.517.

Umubare w’abarwayi bari kwitabwaho wo wavuye ku 1.200 ugera ku 3560 mu gihe abarembye bo bikubye kabiri bava kuri batandatu baba 13. Abitabye Imana bo biyongereyeho 53 bava kuri 326, ubu ni 379.

Ku wa 19 Mata 2021, agace kabonetsemo abarwayi benshi kari Huye yari ifite umunani, Kigali [7], Ngoma na Nyanza [5], Rubavu na Muhanga [2], mu gihe i Musanze na Kamonyi nta murwayi wahabonetse.

Imibare yakomeje kuzamuka cyane kuko ku wa 19 Kamena 2021, abarwayi 469 basanzwemo Covid-19 mu bipimo 8928. Nka Kigali gusa yabonetsemo 192, Rubavu [111], Musanze [29], Kamonyi [26] na Muhanga yabonye 23.

Imibare yo ku wa 18 Kamena 2021 yatangajwe n’Umuyobozi w’Ibitaro bya Nyarugenge bivurirwamo abarwayi ba Coronavirus, Dr Abimana Deborah, yerekanye ko abarembye bikubye kane mu cyumweru, mu gihe 40% by’abarwariye muri ibi bitaro bari ku mashini zibongerera umwuka.

Ibi bitaro bifite ibitanda bisaga 130 bishyirwaho indembe za COVID-19 kandi byose byaruzuye. Ubu bwiyongere bwatangiye kurenga ubushobozi bwabyo, hari no gutekerezwa uko Ibigo Nderabuzima bya Gatenga na Kanyinya byari bimaze amezi arenga atanu bitakira abarwayi byakongera kwifashishwa.

Impuguke mu Kurwanya no gukumira Indwara z’ibyorezo, Dr Ndahindwa Vedaste, yabwiye RBA ko kwiyongera kw’abandura COVID-19 biterwa no kwirara.

Yagize ati “Covid-19 imaze igihe kirekire ku buryo hari abaturage bacitse intege ariko virusi yo ntiyigeze icika intege. Turabibona ko igenda yiyuburura ikagaruka ifite ubukana bukomeye.’’

Yavuze ko abaturage bakwiye kubahiriza ingamba zifatwa mu guca ingufu Coronavirus.

Yakomeje ati “Iyo umuturage atabikoze hari ingamba zikomeye zifatwa kuko nta wareka ngo icyo cyorezo gikomeze cyiyongere. Iyo rero hafashwe izo ngamba wenda ikomeye cyane ni imwe twita guma mu rugo, nta we uba abyifuza ari na Leta ubwayo kuko bigira izindi ngaruka haba ku buzima bw’abantu n’ubw’igihugu muri rusange.”

Ubwiyongere bwa Coronavirus bwatumye hafatwa ingamba zikakaye

Ubwiyongere bw’imibare ya Coronavirus buhuzwa n’impamvu zitandukanye zirimo no kudohoka ku ngamba zo kwirinda ikwirakwira ry’icyorezo. Nko mu Karere ka Rubavu, iyi mibare yatumbagiye nyuma y’urujya n’uruza rw’abantu rwakurikiye iruka ry’Ikirunga cya Nyiragongo ryatumye Abanye-Congo babarirwa mu bihumbi bahungira mu Rwanda.

Imibare ya Minisiteri y’Ubuzima yerekana ko icyorezo cyongeye gukwira mu gihugu hose ndetse muri Kamena ho cyakajije umurindi.

Imibare ya vuba yerekana ko nko ku wa 10 Kamena handuye 112, tariki 15 Kamena baba 298, ku wa 17 Kamena ni 422, ku wa 18 Kamena babaye 451 mu gihe ku wa 19 Kamena 2021 bari 469.

Mu minsi itanu itandukanye ya Kamena gusa habonetse abarwayi 1.752 bashya ba Coronavirus, ni imibare iruta iy’ababonetse muri Gicurasi yose kuko bari 1.738.

Inshuro nyinshi, inzego z’ibanze n’iz’umutekano zikunze gufatira abantu mu birori byo kwishimisha, abahindura ingo utubari n’ibindi bikorwa bitemewe.

Ubwiyongere bwa COVID-19 bwatumye kuva tariki ya 17 Kamena 2021, Rubavu ishyirwa muri Guma mu Karere ndetse ingendo zirakumirwa kuva saa Moya kugeza saa Kumi za mu gitondo.

Ni ingamba zatangajwe na Minisiteri y’Ubutegetsi bw’Igihugu zikubiyemo amabwiriza agamije gukumira ikwirakwira rya Covid-19 muri Rubavu n’imirenge ikora ku mipaka y’ibindi bihugu.

Mu mezi abiri ashize, abantu bari bamaze gukingirwa Coronavirus mu Rwanda mu bikorwa byatangiye ku wa 5 Werurwe 2021 bari 349.702, ubu ni 390.339 bakingiwe.

Abakingiwe bagirwa inama yo kutirara no kudohoka ku ngamba zo kwirinda kuko na bo bashobora kwandura, bakananduza abandi. Ikigo cy’Igihugu cy’Ubuzima, RBC, giheruka kugaragaza ko ubwandu bushya bwatumbagiye ku gipimo cya 275%, ndetse abantu 400 mu bakingiwe basanzwe baranduye.


Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa