Minisiteri y’Ubuzima yatangaje ko kuri uyu wa Gatatu umugore w’imyaka 54 wo mu mujyi wa Kigali yahitanywe na Covid-19bituma umubare w’abamaze guhitanwa n’icyo cyorezo kuva kigeze mu Rwanda ugera kuri 365.

Abantu banduye kuri uyu wa Gatatu ni 114 bituma abamaze kwandura bose baba 27548. Abakize ni 64, bituma abamaze gukira bose baba 26341. Abakirwaye ni 842 barimo batandatu barembye.

Mu barwayi bashya, abenshi babonetse i Kigali kuko habonetse 62 mu gihe i Rubavu havuye 20.

Abantu 238,319 nibo bamaze guhabwa doze ya kabiri y’urukingo rwa rwa AstraZeneca barimo 824 baruhawe kuri uyu wa Gatatu.

Abakingirwa urushimangira barasabwa kwegera ikigo nderabuzima kiri hafi yabo kuko atari ngombwa ko umuntu agorwa no gusubira aho yafatiye urukingo bwa mbere kubera ikoranabuhanga ryifashishijwe mu kubika amakuru.

Kuri ubu, abenshi mu barimo guhabwa doze ya kabiri biganjemo abahawe doze ya mbere y’urukingo rwo mu bwoko bw’Astra Zeneca. Gahunda y’ikingira ya mbere yatangiye nyuma y’iminsi ibiri gusa u Rwanda rwakiriye icyiciro cya mbere cy’inkingo rwemerewe muri gahunda ya COVAX mu ntangiriro za Werurwe 2021.

Abaturarwanda barasabwa kutirara kuko icyorezo kigihari ndetse hakomeje gufatwa ingamba nshya zigamije gukumira ikwirakwizwa ryacyo, harimo no kwirinda ingendo zitari ngombwa no kwirinda kujya ahantu hahurira abantu benshi kandi hafunganye.

Kuri ubu haracyubahirizwa amabwiriza yashyiriweho kwirinda. Ingendo hagati y’Umujyi wa Kigali n’Intara, ndetse no hagati y’Uturere dutandukanye tw’Igihugu zirakomorewe.

Guhera ku wa 31 Gicurasi 2021, ingendo zirabujijwe guhera saa yine z’ijoro (10:00 pm) kugeza saa kumi za mugitondo (4:00 am) uretse mu Karere ka Karongi aho zibujijwe guhera saa moya z’ijoro (7:00pm) kugeza saa kumi za mugitondo (4:00am).

Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.