Ubushakashatsi bwagaragaje ko mu Rwanda hagaragaye ubwoko butandatu bwa COVID-19 burimo Delta yihariye ubwandu bushya ku kigero cya 56.6% nk’uko byatangajwe na Minisitiri w’Ubuzima Dr. Ngamije Daniel, wasobanuye ko mu bipimo 242 bakoreyeho isuzuma ry’ubwoko bw’icyo cyorezo, 137 bwari ubwoko bwa Delta B.1.617.2 (IN).

Sponsored Ad

Ubundi bwoko bwagaragaye ni ubwitwa SARS-COV-2 Wildtyp bwatahuwe ku bantu 49 bangana na 20.2%, Epsilon B.1.427/B1.429 (CA) bwatahuwe ku bantu 38 bangana na 15.7%, ubwoko butazwi bwabonetse ku bantu 13 bangana na 5.4%, Beta B.1.351 (ZA) yatahuwe kuri 4 bangana na 1.6% ndetse n’ubwitwa B.1.576 bwabonetse ku muntu umwe (0.4%).

Minisitiri w’Ubuzima Dr. Ngamije Daniel, yahamije ko mu gihe ubwandu bwa COVID-19 muri rusange bukiri hejuru cyane kuko burenga igipimo kiri munsi ya 3%, ari na cyo umuntu yavuga ko u Rwanda rwaba rufite ubushobozi bwo gukurikirana bidasabye ubushobozi rudafite.

Yavuze ko nubwo gahunda ya Guma Mu Rugo mu Mujyi wa Kigali no mu tundi turere 8 yatanze umusaruro, imibare ikiri hejuru kuko hakiri uturere twinshi tugifite hejuru ya 5% y’ubwandu.

Muri rusange imibare y’ubwandu yaragabanyutse mu minsi 10 ishize ya Guma Mu Rugo, aho mu Karere ka Gasabo yavuye kuri 5.6% ikagera kuri 4.4%, mu Karere ka Nyarugenge iva kuri 5.7% igera kuri 3.8% mu gihe mu Karere ka Kicukiro ari na ko kari kazahaye, yavuye kuri 6.3% ikagera kuri 3.8%.

Avuga ku kuba ingamba za Guma mu rugo zongerewe,Minisitiri Ngamije yagaragaje uburyo iki cyorezo cyongereye umubare w’abarwayi bakirirwa kwa muganga, aho guhera muri Kamena abarwayi bavuye ku babarirwa muri 25, ibitaroo bya Nyarugenge bikuzura, hagafungurwa n’ibindi byari byarafunzwe.

Ati: “Mu bitaro bya Nyarugenge twatangiye dufite abarwayi 20-25 kuko twari twarabasezereye mbere, tugeza ku barwayi 136 biruzura, dufungura irindi vuriro ryakira abantu bafite COVID-19 muri Kicukiro/ Gatenga rifite ibitanda 67 na byo biruzura, tujya Gatsata haruzura, tujya Kanyina na ho haruzura.”

Minisitiri Ngamije yavuze ko iminsi 5 y’inyongera kuri gahunda ya GumaMuRugo izatuma" tugabanya cyane ubwandu, ku buryo imibare y’abandura cyangwa abaremba izarushaho gusubira hasi bityo dukumire kuba icyorezo cyazamuka ngo kinagabanye imbaraga igihugu cyashyizeho zo kukirwanya.

Mu cyumweru gishize, nibura abantu 252 ni bo barembejwe n’iki cyorezo bahabwa ibitaro. Kongera iminsi ya Guma Mu Rugo byitezweho kugabanya imibare y’abandura ku rwego rwo hejuru.

Uko ibipimo byafashwe mu turere

Mu Karere ka Rwamagana, abari bateganyijwe gupimwa ni 21 504, mu gihe abapimwe ari 21 524, abanduye ni 1 275 bari ku ijanisha 5.9%. Muri Kamonyi abari gupimwa ni 23 359, abapimwe ni 23 365, abanduye 1 302, bakaba bari ku ijanisha rya 5.65.

I Burera abari gupimwa ni 23 090, abapimwe ni 17 840, abanduye ni 963, bakaba bari ku ijanisha rya 5.4%. Muri Nyagatare abari gupimwa ni 31 959, abapimwe ni 32 442, abanduye 1 668, bari ku ijanisha rya 5.1%.

Mu Karere ka Gicumbi, abagombaga gupimwa ni 27 140, abapimwe ni 26 256, abanduye ni 1 108, ijanisha ni 4.2% mu gihe muri Musanze, abagombaga gupimwa ari 26 264, abapimwe ni 17 679, abanduye ni 701, ijanisha rya 4.0% .

Mu Karere ka Rutsiro, abagombaga gupimwa ni 22 272, abapimwe ni22 518, abanduye 622, ijanisha 2.8% naho mu Karere ka Rubavu, abagombaga gupimwa 27 692, abapimwe 27 331, abanduye 461, ijanisha 1.7%.

Raporo y’ibipimo byafashwe mu turere dutandukanye: