Mu gitondo cyo Kuri uyu wa Gatanu u Rwanda rwakiriye ikindi cyiciro cy’inkingo zo mu bwoko bwa AstraZeneca 50,000 zabonetse ku nkunga y’igihugu cy’u Buhinde.

Ni inkingo zibonetse kandi zitari muri gahunda mpuzamahanga y’ibihugu izwi ku izina rya Covax Initiative igamije gufasha ibihugu bikennye inkingo.

Muri iki gitondo,Minisitiri w’Ububanyi n’Amahanga,Dr Vincent Biruta ari kumwe na Oscar Kerketta, uhagarariye Ubuhinde mu Rwanda bageze ku kibuga cy’indege kwakira izi nkingo za Covid-19.

Minisitiri w’Ububanyi n’Amahanga n’Ubutwererane, Dr Vincent Biruta, yatangaje ko izi nkingo nshya zatanzwe n’u Buhinde zageze mu Rwanda mu gitondo cyo kuri uyu wa Gatantu tariki 5 Werurwe 2021.

Ati “Guverinoma y’u Rwanda yashimiye iy’u Buhinde n’ibindi bihugu by’abafatanyabikorwa ku bw’umusanzu w’ingenzi mu gukomeza guhangana n’icyorezo cya COVID-19.”

Inkingo za Astrazeneca zakozwe na Kaminuza ya Oxford iherereye mu Bwongereza, maze zitunganywa n’Ikigo cyo mu Buhinde gikora inkingo cyitwa Serum Institute ari naho zaje ziturutse.

Ku wa Gatatu nibwo u Rwanda rwakiriye inkingo 342.960 zanyujijwe muri gahunda ya Covax,zaje mu byiciro bibiri kandi mu bwoko bubiri harimo 102.960 za Pfizer n’izigera kuri 240.000 za AstraZeneca.

Biteganyijwe ko mu ntangiriro z’icyumweru gitaha hazakirwa izindi nkingo ibihumbi 500. U Rwanda ruzajya rwakira inkingo mu byiciro, kugeza igihe umubare w’inkingo rwemerewe muri gahunda ya Covax miliyoni 1.2 zirangiye.

U Rwanda ruzahabwa inkingo 1.098.960 muri iyi gahunda ya COVAX. Izi nkingo ariko ntabwo zizaba zihagije, ari yo mpamvu hamaze gutegurwa ingengo y’imari ingana na miliyoni 124 $ izifashishwa muri gahunda yo kugura izindi.

U Rwanda ruteganya ko uyu mwaka wa 2021 uzarangira rukingiye 30 % by’abaturarwanda ndetse uwa 2022 ukarangira hakingiwe abandi 60%.