Umuganga w’Umunyarwanda Dr. RUTAYISIRE François Xavier Yegukanye Igihembo mu Nama Mpuzamahanga y’Ubumenyi bw’Ubwonko (International Neuroscience Congress) yabereye i Tbilisi, muri Georgia

Sponsored Ad

Tbilisi, Georgia – Dr. RUTAYISIRE François Xavier, umuganga uri kwimenyereza umwuga wo kubaga indwara zifata ubwonko, uruti rw’umugongo ndetse n’imyakura muri Kaminuza y’u Rwanda akaba n’umushakashatsi, yegukanye igihembo cy’icyubahiro mu Nama Mpuzamahanga y’Ubumenyi bw’Ubwonko (NEURO-2024), yabereye i Tbilisi, kuva tariki ya 28 kugeza ku ya 30 Ugushyingo 2024.

Iki gihembo cyatanzwe mu rwego rwo gushima ubushakashatsi bwihariye yakoze ku gusana imyakura yangiritse, ubushakashatsi bwashimangiye ko u Rwanda rutanga umusanzu ukomeye mu bumenyi mpuzamahanga kumikorere y’ubwonko ndetse n’imyakura.

Ubushakashatsi

Afashijwe na Dr. Hakizimana David inzobere mu kubaga ubwonko, urutirigongo ndetse n’imyakura mu bitaro byitiriwe Umwami Faisal i Kigali, Dr. RUTAYISIRE yagaragaje ibyavuye mu bushakashatsi bwe bwatangiriye muri ibyo bitaro, bugamije kureba uko gusana imyakura byongera ubushobozi bw’abarwayi mu buzima bwa buri munsi. Aho urugingo (urugero nk’ukuboko)rutakoraga rwongera rugakora.

Ubushakashatsi bwe bushingiye ku buryo bwo kugenzura abarwayi mu gihe kirekire nyuma yo kubagwa imyakura (peripheral nerve surgeries), bugasuzuma uko bagenda bakira ndetse n’iterambere ryabo mumikorere yingingo zitari zigikora mu mezi atandukanye hifashishijwe izuzuma risanzwe rya muganga ndetse n’ibyuma kaburiwe nka NCS/EMG.

Mu ijambo rye, yavuze ko:
"Iki gihembo ni ikimenyetso cy’ubushobozi bw’abaganga bacu ndetse n’ubushake bw’ibitaro byacu mu guteza imbere ubushakashatsi bugirira akamaro isi yose.

Nishimiye ko, Urugaga rwa’baganga babaga indwara z’ubwonko (Rwanda neurosurgical Center), kaminuza y’u Rwanda ndetse n’ibitaro bya King Faisal hospital Rwanda ndetse n’igihugu muri rusange byamfashije kugera kuri uru rwego rw’icyubahiro."

Impamvu Iki Gihembo ari Ingenzi

Dr. RUTAYISIRE ni we muganga wenyine wo muri Afurika wegukanye iki gihembo kuva iyi nama yabaho, kuri iyi nshuro yari yitabiriwe n’abashakashatsi n’abaganga baturutse mu bihugu birenga 50. Iki gihembo cyashimangiye umuhate w’u Rwanda mu guteza imbere ubuvuzi bushingiye ku bushakashatsi, ndetse kigaragaza ko ubumenyi bw’abaganga b’Abanyarwanda bugeze ku rwego mpuzamahanga.