Umunyarwanda Dr Olivier Uwishema, yahawe igihembo n’Ishuri Rikuru ry’Ubumenyi ku Rwungano rw’Imitsi (American Academy of Neurology/ AAN) rimushimira umusnzu atanga mu bushakatsi n’ubuvuzi mu birebana n’urwungano rw’imitsi (neurology).

Urungano rw’imitsi ni rwo rutegeka cyangwa rugakoresha umubiri wose rutanga amabwiriza ava mu bwonko, uruti rw’umugongo, udutsi duto n’imyakura. Ni rwo rukusanya amakuru y’ibyiyumvo byose umuntu agira maze hagakurikiraho ibikorwa umuntu akora abishatse cyangwa atabishatse.

Urwungano rw’iminsi iyo rufite ikibazo, umubiri wose ugira ikibazo kuko ntushobora kwakira amakuru cyangwa ngo ugire icyo uyakoraho.

Dr. Uwishema waherewe igihembo cyitiriwe H. Richard Tyler mu nama yabereye mu Mujyi wa Chicago hagati ya tariki ya 18-22 Mata 2026, yagaragaye ku rutonde rwa Forbes rw’abaganga bari munsi y’imyaka 30 mu mwaka wa 2023.

Icyiciro yahembewemo kizirikana abahanga mu bushakashatsu ku ngingo zitandukanye ndetse n’urwego rw’imirimo bagezeho batanga umusanzu ufatika mu kurushaho guteza imbere ubumenyi ku buvuzi bw’urwungunano rw’imitsi.

Imirimo yahembewe ihera ku musanzu we mu guteza imbere siyansi yiga urwungano rw’imitsi, kwigisha ubuvuzi burwerekeye ndetse n’ubushakashatsi bwibanda cyane ku kongerera ubushobozi ubufatanye mpuzamahanga by’umwihariko himakazwa imikoranire n’ibice by’Isi bitarabona ubushobozi buhambaye.

Icyo gihembo gishya yahawe cyamushyize mu bahanga mu buvuzi bw’urwungano rw’imitsi n’abashakashatsi bubashywe mu ruhando mpuzamahanga.

Biteganywa ko nyuma yo guhabwa icyo gihembo Dr. Uwishema azakomereza ubushakashatsi bwe kuri iyo ngingo mu Ishuri rya St. Louis, Missouri, ryo muri Kaminuza ya Washington muri Leta Zunze Ubumwe za Amerika.

Dr. Uwishema yabwiye The New Times ko yishimiye cyane kwakira iki gihembo cyitiriwe H. Richard Tayler cya 2026.

Yagize ati: “Guhabwa iki gihembo bivuze byinshi kuri jye kubera ko bidashimangira intambwe nteye ku giti cyanjye gusa, ahubwo binagaragaza agaciro k’ubushakashatsi, guhugura abandi ndetse n’ubufatanye mpuzamahananga mu kurushaho kwimakaza siyansi y’urwungano rw’imitsi n’ubuvuzi bw’ubwonko.”

Uyuu mugabo washinze Umuryango ukora ubushakashatsi Oli Health Magazine Organization (OHMO) yavuze ko yatewe ishema no guhererwa igihembo mu nama ihuje abahanga mu bushakashatsi baturutse mu bice bitandukanye by’Isi.

Yakomeje agira ati: “Binyongerera imbaraga zo gukomeza kongera ubushobozi mu bushakashatsi binyuze mu Muryango OHMO, ndetse ni gukora cyane ngo ntange umusanzu ufatika mu murimo wa siyansi ushobora kurushaho kunoza ubuvuzi, by’umwihariko mu bice bitabikwiriye cyangwa bidafite ubushobozi buhagije.”

Yongeyeho kandi ko gushimirwa kwe bishobora gutanga umusaruro no mu gukangura urubyiruko rwa Afurika rukarushaho kwigirira icyizere cy’uko ibyo rukora bishobora kwemerwa mu ruhando mpuzamahanga kandi bikagira uruhare mu hazaza h’ubuvuzi n’ubushakashatsi ku Isi yose.

Dr. Uwishema yagiye abona n’ibindi bihembo binyuranye, aho mu mwaka wa 2022 yahawe igihembo mpuzamahanga cyaturutse mu Muryango wita ku Buvuzi bwa Kanseri y’Imitsi muri Leta ya Florida, muri Leta Zunze Ubumwe za Amerika (USA).

Nanone kandi mu 2025, yatoranyijwe mu bemerewe kwiga Amasomo y’Ubuvugizi Mpuzamahanga mu 2025, aterwa inkunga akanategurwa n’Ishuri Rikuru ryigisha Ubumenyi ku Rwungano Ngogozi rifatanyije n’Ihuriro ry’Amashyirahamwe ateza imbere ubwo buvuzi ku Isi.

Imirimo ye yashimwe n’Umuryango w’Abibumbye, ndetse n’umuryango w’i bwami w’Ubwami bw’u Bwongereza (UK).