Igisirikare cy’ u Rwanda cyatangaje Abaminisitiri b’ ingabo mu bihugu 10 byo muri Afurika y’ iburasirazuba bategerejwe I Kigali mu nama yiga ku mutekano n’ amahoro.

Iyi nama y’ abaminisitiri b’ ingabo rugiye kwakira ejo tariki 27 Nyakanga yabanjirijwe n’ inama ya 24 y’inzego z’ Ingabo zihora ziteguye gutabara mu karere ka Afurika y’Iburasirazuba EASF. Inama y’ izi nzego zishinzwe kujya inama yatangiye taliki 24 kugeza taliki ya 28 Nyakanga 2018.

Muri izi nama hakaba harimo urwego rw’inzobere mu by’umutekano taliki ya 24 na 25 Nyakanga 2018, irazakurikirwa n’Inama y’Abakuru b’Ingabo taliki ya 26 Nyakanga , izi nama zikazasozwa n’Inama izahuza ba Minisitiri b’Ingabo taliki ya 27 Nyakanga 2018.

Izo nama zose zikazasozwa n’igikorwa cy’umuganda cyiswe (EASF Day) kikazabera muri Gikomero mu Karere ka Gasabo taliki ya 28 Nyakanga 2018. Izi nama zikaba zifite insanganyamatsiko igira iti: “Amahoro n’Umutekano mu Karere ka Afurika y’Ubirasirazuba”.

Igisirikare cy’ u Rwanda cyatangaje ko ku munsi wa mbere w’Inama y’abajyanama bategura amategeko n’amahame y’uyu muryango wafunguwe k’umugaragaro n’Umugaba Mukuru w’Ingabo zirwanira mu kirere, Jenerali Majoro Charles Karamba aho yababwiye ibisabwa kugira ngo EASF igere ku nshingano zayo.

Yagize ati “Uyu muryango uzuzuza inshingano zawo ari uko hariho amategeko ahamye, inzego zikomeye, ibikorwaremezo, n’Ingabo, Ibikoresho, Imari n’Ubuyobozi buhamye. Ni inshingano rero zanyu nk’abajyanama gutanga inama nyazo ku bayobozi b’Íngabo kugirango ibikenewe byose biboneke kandi bishyirwe mubikorwa”.

Uyu muryango w’Ingabo zihora ziteguye gutabara mu karere ka Afurika y’Iburasirazuba n’ Ingabo zashyizweho na za guverinoma, ukaba ufite inshingano zo kugarura amahoro n’umutekano mu Karere k’Íburasirazuba. Ukaba warashinzwe mu rwego rw’Úmuryango nyafirika ushinzwe umutekano n’ amahoro muri Afurika, ukaba ufite inzego eshanu zikurikira: Urwego rushinzwe gutanga amakuru, Urwego rw’Inararibonye, Ingabo zigize uyu muryango, Urwego rushinzwe Imari n’Ubunyamabanga bw’uyu muryango.

Uyu muryango ukaba ugizwe n’Íngabo, polisi n’abasivili. Uyu muryango ukaba warashinzwe muri 2004 mu rwego rwo gutanga ingabo ziteguye gutabara aho rukomeye mu karere k’Iburasirazuba. Ukaba warabonye ubushobozi bwo gukora izi nshingano mu mwaka wa 2014, bisobanuye ko ubu ufite ubushobozi bwo gutabara aho rukomeye.

Uyu muryango ugizwe n’Ingabo zikomoka mu bihugu icumi harimo; Uburundi, Comoros, Djibouti, Ethiopia, Kenya, U Rwanda, Seychelles, Somalia, Sudan na Uganda. Icyicaro cy’Ubunyamabanga kikaba kiri I Nairobi muri Kenya, hanyuma icyicaro gikuru cy’uyu muryango kikaba kiri Addis Abeba muri Ethiopia.