skol
Fortebet

"Nta mwuka w’intambara uri hagati y’u Rwanda na RDC"-Leta y’u Rwanda

Amakuru   Yanditswe na: Dusingizimana Remy 30 May 2022

U Rwanda rwahakanye ko rutiteguye guhangana mu ntambara na RDC nkuko hari ibihuha byabivugaga nyuma y’aho RDF isabye iki gihugu kurekura ingabo zacyo bivugwa ko zashimuswe na FARDC ndetse n’umutwe wa FDLR bakorana.

Umuvugizi wungirije wa Guverinoma y’u Rwanda, Alain Mukuralinda, yavugiye kuri Televiziyo y’Igihugu ko nta mwuka w’intambara uri hagati ya RDC n’u Rwanda ndetse ngo ari ibyagombaga kuba baba barirwanyeho ubwo ingabo z’iki gihugu zateraga amabombe ku butaka bw’u Rwanda.

Yakomeje ati "Umwuka wo kurwana nta wuhari, iyo uza kuhaba bari kurasa kuri Terirwari y’u Rwanda mu kwezi kwa gatatu ukihangana, bakongera mu kwa gatanu na we ukarasa, ntabwo bivuze ko u Rwanda rudashobora kurasa."

"Ni ukuvuga ngo ku ruhande rw’u Rwanda umwuka wo kurwana ntuhari, umwuka uhari ni uwo gukemura ibibazo mu nzira izo arizo zose, mu nzira zagutse cyangwa se n’izifunze zirimo abantu bakeya, kugira ngo haboneke umuti w’ikibazo urambye."

Yanavuze ko ubushotoranyi bukomeje, u Rwanda ruzakora ibishoboka byose kugira ngo ubwo bushotoranyi butajyana ku ntambara.

Yakomeje ati "U Rwanda rwiyemeje gukora ibishoboka byose kugira ngo bufatanye na Congo, ubufatanye n’ibihugu mu karere, kugira ngo kiriya kibazo gikemuke binyuze mu nzira y’ibiganiro n’imishyikirano."

"Runasaba kandi ko imyanzuro iba yafashwe ishyira mu bikorwa, kandi ko Congo yagerageza guca mu nzira ziba zateganyijwe, ariya magambo asa n’aho aba akongeza bagerageza kuyagabanya."

Yavuze nk’umuyobozi wari wasabye abaturage gufata imihoro ko aba akwiye kwamaganwa, kandi agafatirwa ibyemezo.

Nyamara ngo babona ku rundi ruhande rwa Congo, Guverinoma ibigendamo biguru ntege. Gusa ngo ntibyaca u Rwanda intege.

U Rwanda ruravuga ko ingabo za Repubulika ya Demokarasi ya Kongo zifatanyije n’inyeshyamba z’umutwe wa FDLR bateye ingabo z’u Rwanda ku mupaka w’ibihugu byombi,bagashimuta abasirikare babiri b’u Rwanda bari ku irondo.

Itangazo rya Ministeri y’Ingabo z’u Rwanda ryagaragaye ku rubuga rwayo rwa Twitter na Interineti riravuga ko abo basirikare b’u Rwanda ari Kaporali Nkundabagenzi Elysee na Soldat Ntwali Gad, bombi bakaba bari mu maboko ya FDLR mu burasirazuba bwa Kongo.

Umuvugizi w’ubutegetsi bw’intara ya Kivu ya Ruguru, Jenerali de Brigade Sylvain Ekenge Bomusa we yasohoye itangazo rishinja leta y’u Rwanda kugaba ibitero muri Kongo ifatanije n’inyashyamba z’umutwe wa M23.

Ku rubuga rwa Twitter rw’ubutegetsi bw’Intara ya Kivu ya ruguru berekanye abasirikare bambaye imyenda bavuga ko ari iy’ingabo z’u Rwanda, indangamuntu z’abo n’amakarita ya gisirikare.

U Rwanda ruheruka gushinja igihugu cya Kongo kurasa ibisasu byo mu bwoko bwa roketi ku butaka bwarwo taliki ya 23 z’uku kwezi rusaba itsinda ry’abasirikare rishinzwe kugenzura imipaka ya Kongo n’ibihugu biyikikije (EJVM) gukora iperereza ku iraswa ry’ibyo bisasu.

Repubulika ya demokarasi ya Kongo yo iheruka gutumiza ambasaderi w’u Rwanda i Kinshasa gutanga ibisobanuro ikurikizaho guhagarika ingendo z’isosiyete Nyarwanda y’indege Rwandair.

Muri iki cyumweru abarwanyi b’umutwe wa M23 bamaze kugera mu birometero hafi 20 uvuye mu mujyi munini w’uburasirazuba bwa Kongo, Goma, bamarana igihe gito ikigo cya gisilikare kinini kurusha ibindi muri ako karere nkuko ejo byatangajwe n’ibiro ntaramakuru by’Abongereza, Reuters.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

U Rwanda rwamaganye raporo ya UN irushinja ko rwateye ingabo za DR Congo...

Guverinoma y’u Rwanda yamaganye ibikomeje kuvugwa ko Ingabo zarwo zagiye...
5 August 2022 0

Gisagara:Umugeni yategerereje umukunzi we ku kiliziya bari gusezeranira...

Umukobwa wo mu Murenge wa Mukindo mu Karere ka Gisagara yategereje umuhungu...
4 August 2022 0

Nyanza: Batewe impungenge n’umusore watangiye gusambanya abana nyuma y’igihe...

Mu murenge wa Kigoma mu karere ka Nyanza hari umusore bahimbye Rukacira...
4 August 2022 0

Rubavu: Imodoka 2 zagonganye benshi bahasiga ubuzima

Mu gitondo cyo kuri uyu wa Kabiri, ahagana saa Yine, mu Murenge wa Gisenyi...
2 August 2022 0

RIB yasubije Umushinwakazi miliyoni 14 FRW zari zibwe n’umushoferi...

Urwego rw’Igihugu rw’Ubugenzacyaha (RIB), rwasubije umushoramari...
2 August 2022 0

Rubavu: Wa mukobwa washinjaga Gitifu kumukura iryinyo kuko yanze ko...

Umukobwa witwa Uwimanimpaye w’imyaka 22 y’amavuko waregaga Gitifu wa Kanzenze...
2 August 2022 2