Perezida wa Repubulika Paul Kagame yagaragaje ko iterabwoba n’ubuhezanguni atari ibyo kwihanganira, ashimangira ko amahoro n’umutekano ari byo bizafasha Afurika.
Ibi Perezida Kagame yabigarutse mu ijambo yagejeje ku bitabiriye inama igamije kurebera hamwe ingamba zafatwa mu kurandura amakimbirane, guhangana n’ikibazo cy’abimukira, guteza imbere amahoro no kwimakaza iterambere ku mugabane wa Afurika.
Ni butumwa yatanze hifashishijwe ikoranabuhanga ku wa 17 Mutarama 2023 mu nama iri kubera (...)

Sponsored Ad

Perezida wa Repubulika Paul Kagame yagaragaje ko iterabwoba n’ubuhezanguni atari ibyo kwihanganira, ashimangira ko amahoro n’umutekano ari byo bizafasha Afurika.

Ibi Perezida Kagame yabigarutse mu ijambo yagejeje ku bitabiriye inama igamije kurebera hamwe ingamba zafatwa mu kurandura amakimbirane, guhangana n’ikibazo cy’abimukira, guteza imbere amahoro no kwimakaza iterambere ku mugabane wa Afurika.

Ni butumwa yatanze hifashishijwe ikoranabuhanga ku wa 17 Mutarama 2023 mu nama iri kubera Nouakchott muri Mauritania.

Perezida Kagame yavuze ko amahoro ari uruti rw’umugongo rw’iterambere rirambye.

Yagize ati: “Amahoro ni uruti rw’umugongo rw’ iterambere rirambye. Imiyoborere mibi ni nyirabayazana y’umutekano muke. Ubwo u Rwanda rwatangiraga urugendo rw’iterambere nyuma ya Jenoside yakorewe Abatutsi, kubaka inzego zikomeye, kugarura ubumwe no kwizerana byarihutirwaga cyane. Ibi byahaye igihugu cyacu umusingi ukomeye twubakiyeho umutekano urambye n’iterambere.

Icyakora, kwimakaza amahoro ni ikintu gisaba ubufatanye.

Iterabwoba n’ubuhezanguni byambukiranya imipaka, bigakwira vuba ari nako bigira ingaruka ku baturage hirya no hino ku isi. Afurika nayo ntiyasigaye.

Niyo mpamvu nk’igihugu twafashe icyemezo cyo gutanga umusanzu mu kurwanya ibikorwa by’iterabwoba no gusana ibyangijwe n’intambara ku mugabane wa Afurika.

Turi mu isi irushaho kugenda iba nk’umudugudu kandi ihurijwe hamwe. Nta mwambaro ukwira bose wafatwa nk’i gisubizo rusange kuri ibi bibazo byose, kuko hagomba kwitabwa ku mwihariko wa buri gihugu."

Yavuze ko ubuhezanguni n’iterabwoba ari bimwe mu bidindiza umugabane wa Afurika,ko atari ibyo kwihanganira.

Inama yiga ku mahoro muri Afurika ni uburyo bwiza bwo gushimangira ubufatanye. Icyo Afurika ikeneye cyane ni ubushake bwa Politiki mu gushyira hamwe amikoro akenewe mu gushakira umuti umuzi w’ibibazo.