Niyomurengezi Vedaste w’imyaka 21 y’amavuko, yafatiwe mu cyuho atwaye udupfunyika tw’urumogi 2,040 yari yahishe mu mufuka urimo ibishyimbo na karoti abizanye mu Mujyi wa Kigali.
Ifatwa rya Niyomurengezi ryatumye hafatwa n’abandi bagore babiri babiri barimo uwamuhaye ikiraka, bikekwa ko bafatanyije mu cyaha cyo kwinjiza no gukwirakwiza urumogi mu Rwanda.
Polisi y’u Rwanda ivuga ko Niyomurengezi na bagenzi be ari bo Niragire Elizabeth w’imyaka 34 na Nyirategera Marie Chantal w’imyaka 43 bafatiwe (...)

Sponsored Ad

Niyomurengezi Vedaste w’imyaka 21 y’amavuko, yafatiwe mu cyuho atwaye udupfunyika tw’urumogi 2,040 yari yahishe mu mufuka urimo ibishyimbo na karoti abizanye mu Mujyi wa Kigali.

Ifatwa rya Niyomurengezi ryatumye hafatwa n’abandi bagore babiri babiri barimo uwamuhaye ikiraka, bikekwa ko bafatanyije mu cyaha cyo kwinjiza no gukwirakwiza urumogi mu Rwanda.

Polisi y’u Rwanda ivuga ko Niyomurengezi na bagenzi be ari bo Niragire Elizabeth w’imyaka 34 na Nyirategera Marie Chantal w’imyaka 43 bafatiwe nu Tugari tubiri tw’Umurenge wa Kanzenze, Akarere ka Rubavu.

Niyomurengezi yafatiwe mu Kagari ka Kirerema mu gihe Niragire na Nyirategera bo bafatiwe mu Kagari ka Kanyirabirori nyuma yo kumenya ko umwe yagombaga kunyuzwaho urwo rumogi mu gihe undi yari nyirarwo.

Polisi y’u Rwanda ivuga ko yabafatiye mu bikorwa byo kurwanya no gufata abacuruza ibiyobyabwenge byabaye ku wa Gatandatu taliki ya 11 Gashyantare.

Chief Inspector of Police (CIP) Mucyo Rukundo, ushinzwe guhuza ibikorwa bya Polisi n’abaturage mu Ntara y’Iburengerazuba, yavuze ko habanje gufatwa Niyomurengezi ahagana ku isaha ya saa tanu z’amanywa, biturutse ku makuru yatanzwe n’umuturage.

Yagize ati: “Tugendeye ku makuru twahawe n’umuturage ko Niyomurengezi ateze imodoka yerekeza mu Mujyi wa Kigali afite ibiyobyabwenge, hateguwe igikorwa cyo kumufata hashyirwa bariyeri mu muhanda Rubavu-Musanze mu Mudugudu wa Kirerema, ubwo imodoka yari arimo yasakwaga basanga afite udupfunyika tw’urumogi 2,040 yari yashyize mu mufuka urimo ibishyimbo na karoti mu rwego rwo kuruhisha.”

Akimara gufatwa ni we wavuze ko yaruhawe n’uwitwa Niragire ngo arumushyirire abakiriya be mu Mujyi wa Kigali, akaba yari bumwishyure amafaranga y’u Rwanda 30,000 agezeyo.

Niragire amaze gufatwa na we yahishuye ko na ww yabitsaga urwo rumogi kwa Nyirategera bombi batuye mu Kagari ka Kanyirabirori, bombi bahita batabwa muri yombi.

Bose uko ari batatu bashyikirijwe Urwego rw’Igihugu rw’Ubugenzacyaha (RIB) kuri Sitasiyo ya Kanama kugira ngo hakomeze iperereza ku cyaha bakurikiranyweho, mu gihe hagishakishwa n’abandi bafatanya muri ubu bucuruzi butemewe.

Iteka rya Minisitiri Nº001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263, ivuga ko umuntu wese ukora, uhinga, uhindura, utunda, ubika, uha undi, ugurisha mu Gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni 20 ariko atarenze miliyoni 30 ku byerekeye ibiyobyabwenge bihambaye.