Urukiko rwo muri Sudani rwakatiye igihano cy’urupfu Umuyobozi w’umutwe witwaje intwaro wa RSF urwanya ubutegetsi bw’iki gihugu, Gen Mohamed Hamdan Dagalo, nyuma yo kumuhamya ibyaha by’intambara, ibyibasiye inyokomuntu n’ibyaha Jenoside.

Uyu mwanzuro wafashwe n’urukiko rwo mu Mujyi wa Port Sudan, igice kigenzurwa n’ingabo za Sudani, kuri uyu wa 13 Nyakanga 2026.

Abandi bofisiye bakuru 15 ba RSF na bo bahamijwe ibyaha birimo kuyobora ibitero byagabwe ku basivili mu Ntara ya Darfur, gusenya, gusahura imitungo no kwangiza ibikorwaremezo birimo amashuri, insengero n’inzu zo guturamo.

Abo barimo abavandimwe ba Gen Dagalo barimo Umuyobozi wungirije wa RSF, Abdelrahim Hamdan Dagalo, n’undi witwa Al Qoni Hamdan Dagalo, ndetse n’Umuyobozi w’uyu mutwe muri Leta ya West Darfur, Abdul Rahman Juma Barkallah.

Uru rubanza rwashingiye ku bwicanyi bwakorewe abaturage babarirwa mu bihumbi n’ibikorwa by’iyicarubozo byabereye mu Mujyi wa el-Geneina kuva muri Mata kugeza mu Ugushyingo 2023, byaguyemo Khamis Abbakar wari Guverineri.

Imiryango iharanira uburenganzira bw’ikiremwamuntu yagaragaje ko ibi bikorwa bigize ibyaha by’intambara n’ibyibasiye inyokomuntu, kuko byari bigambiriye abo mu bwoko bwa Masalit n’abandi batari Abarabu.

Umucamanza muri uru rukiko, Mohamed Al-Amin yategetse ko imitungo ya RSF ifatirwa, asaba na Leta gusohora impapuro zisaba Polisi mpuzamahanga (Interpol) gufata aba bayobozi, ikabashyikiriza Sudani.

Intambara y’ingabo za Sudani na RSF yatangiye muri Mata 2023, ubu ikaba imaze gupfiramo abarenga ibihumbi 150 mu gihe abagera kuri miliyoni 12 bahunze. Ishingiye ku kutumvikana hagati ya Gen Abdel Fattah al-Burhan uyoboye iki gihugu na Gen Dagalo.