Hari igihe umuntu akubwira ijambo ukumva ni ugusetsa cyangwa kuganira bisanzwe, ariko mu by’ukuri harimo kukunnyega cyangwa kugutesha agaciro. Kenshi abantu bakoresha amagambo asa n’aryoshye cyangwa asekeje kugira ngo batababaza mu buryo bugaragara, ariko iyo uyasesenguye usanga harimo kunnyega, kugucyurira, kukwishima hejuru cyangwa kugushimisha ku gahato.

Dore amagambo akunze gukoreshwa abantu bakunnyega ariko wowe ushobora kutabibona:

1. “Ni wowe wenyine wabikora gutyo”

Iri jambo rishobora kuvugwa bavuga ikosa wakoze cyangwa uburyo witwaye. Nubwo risa n’irivuga ukudasanzwe kwawe, akenshi riba rigamije kukwereka nk’umuntu udafite ubwenge cyangwa udatekereza neza.

2. “Ariko nawe uratangaje!”

Hari igihe umuntu arivuga aseka, ariko mu mutima aba ashaka kukwereka ko ibyo wakoze cyangwa wavuze bidafite agaciro. Iyo rivuzwe kenshi, rishobora gutuma umuntu atakariza icyizere ibyo akora.

3. “Twese ntitwaba perfect”

Aya magambo ashobora kuvugwa nyuma yo kugukosora cyangwa kuguseka. Uwayavuze aba ashaka kukwereka intege nke zawe ariko mu buryo bworoheje kugira ngo utabifata nabi.

4. “Uriya ni ko ahora”

Iyo abantu bavuga gutya bakwerekeza ku ngeso cyangwa imyitwarire yawe imbere y’abandi, akenshi baba bakunnyega cyangwa bagushyira hasi.

5. “Ntukarakare, ni ugusetsa”

Abantu benshi bakoresha iri jambo nyuma yo kukubwira amagambo akomeretsa.babona ubabaye, bagahita bavuga ko bari gusetsa kugira ngo wirengagize uburyo bakubabaje.

6. “Wow! Ubu se wabimenye?”

Iri jambo rikoreshwa iyo ushaka kuvuga ikintu abandi bamaze igihe bazi. Aho kugufasha cyangwa kugusobanurira neza, baba bashaka kukwerekana nk’utinda kumenya ibintu.

7. “Nta kibazo, tuzabimenyera”

Aha baba bavuga ikosa cyangwa intege nke zawe nk’ikintu abantu bagomba kwihanganira. Bishobora gutuma wumva utifuzwa cyangwa utifitiwe icyizere.

Uko Wakwitwara Iyo Ubonye Bakunnyega

Ntugahite urakara; banza usesengure niba koko amagambo bafite agamije kukubabaza.
Jya wigirira icyizere kandi umenye agaciro kawe.
Niba umuntu ahora akoresha amagambo akubabaza, mubwire uko ubyumva.
Irinde abantu bakoresha amagambo yo gutesha abandi agaciro buri gihe.

Amagambo afite imbaraga cyane. Ashobora kubaka umuntu cyangwa akamusenya. Ni yo mpamvu ari byiza kumenya igihe umuntu ari kugusetsa by’ukuri n’igihe ari kugunnyega yihishe inyuma y’urwenya.