Duherukana ubwo njye na mushiki wanjye Lea twari tuvuye gusenga ntabyumva neza akanyinjiza ku ngufu kwa Kadafi burusheti zikavuza ubuhuha nkabona neza page ya mbere y’ igitabo nari narasomye ku gifubiko gusa nzi ko gifite abo kigenewe twe tutarimo

Sponsored Ad

Amasaha atangiye gukura twarishyuye turataha, mu nzira dutaha twari twishimye, njye na mushiki wanjye dufatanye mu mugongo, ibyishimo, umunezero n’ ikizere twari dutegereje nibyo byari bitatse imitima yacu.

Twageze mu rugo bwije, Lea arakingura turinjira, ndakomeza ncana itara ry’ umurasire turicara,

Lea-“Ahwiiiii! Mana weee! Ndumva ntazi ukomeze!”

Njyewe-“Ngo? Lea! Urumva umeze ute? Uri kubabara hehe?”

Lea-“Bro! Uwamfasha akamfasha koko!...akaba antwaje iyi nda akazayinsubiza ejo!”

Njyewe-“Hhhhhhh! Lea! Uziko wari unkuye umutima?”

Lea-“Byihorere wowe ntubizi! Ndumva nijuse…nako ndumva mpaze”

Njyewe-“Hanyuma se ngufashe iki Lea?”

Lea-“Nsindagiza nyine ujye kundyamisha ubwo se wowe…”

Njyewe-“Hhhhh! Nari ngize ngo urambwiye ngo nkunyuze mu misoto none ngo njye kukuryamisha, ahubwo se uraryama ubishobore? Ubwo uraryamira uruhe ruhande? HHhhhh!”

Lea-“Sha wiseka, nyamara ndakomeje!!”

Njyewe-“Ahaaa! Reka ngerageze nkurandate, gutaka kwawe uko kwaba kungana kose kuba gufite ishingiro kuri njye”

Nahagurukije Lea erega ndamusindagiza! Akanyuzamo agataka, byanteye ubwoba ntangira kwibaza niba ari ukwijuta gusa cyangwa hari inyama itaribwa yariye numva ndushijeho kwicuza impamvu twagiye kwa Kadafi.

Twageze mu cyumba cya Lea ndamuryamisha, maze kumworosa, aba akubise igitwenge cy’ urumenesha ndikanga,

Njyewe-“Lea!”

Lea-“Iki se? Hhhhhh! Mbega wowe? Ese ubwo ubona kwemera ibintu byose bizakugeza kuki? Nta nubwo wananyiryaho ngo wumve ndi guteta? Erega nawe urasindagizaaa…puuu! Nta byawe”

Njyewe-“Lea! Uratinyuka ukambeshya koko? Kuki uba wumva buri gihe wankura umutima?”

Lea-“Yooh! Mbabarira Bro! Ndabizi neza ko ibintu byose kuri wowe ubifata nk’ ukuri kandi ukuri ukwiye kugira icyo ukoraho byongeye kandi kuri njye ho ntacyo navuga utaha agaciro...noneho nkagushuka ntaka? Mbabarira pe! Nagira ngo rata ngushimire negetse umusaya ko wansohokanye ukangurira, ndabizi nakwinjije hariya utabishaka gusa nzi neza ko atari ukutabishaka ahubwo ari ugutinya kwemera ko aho bigeze natwe dukwiye kujya aho abandi bari, Sam! Uri intwari kandi uzacungura umuryango, uri ishema ryanjye ndagukunda mwana wa mama….”

Ibyo Lea yabivugaga agatotsi kamutwara, byarangiye kamwibye, ndamwitegerezaaa…numva ikiniga cy’ ibyishimo kiraje, ndamworosa neza ndahaguruka nanjye nerekera mu cyumba cyanjye.

Nageze mu cyumva nicara ku buriri ntangira gusubiza amaso inyuma nibuka uko umunsi wanjye wagenze, muri uko kwibuka uko umunsi wanjye wagenze nibwo natecyereje intambwe aho zigeze nzitera.

Nongeye kubona neza ko ngeze mu ihuriro ry’ inzira, aho ngomba gushaka ikindi cyerecyezo nanyuramo ngo nkomeze urugendo rugana ku ntego yo guhindura ubuzima bivuye mu maboko yacu.

Igihe cyari kigeze ngo nongere gutecyereza icyo nakoresha igishoro gifatika twari tumaze kubona, mu gicuku rwa gati nibwo igitecyerezo nakibonye, mbona kujya mu buriri ndaryama.

Bwaracyeye nzinduka kare nk’ ibisanzwe, uwo munsi twari gushoka igishanga njye n’ abakozi banjye isuka igatangira kuvuza ubuhuha.

Maze gutunganya isuka Lea yasohotse yayura yinanura,…

Lea-“Oooh Ahwiiii! Sam waramutse?”

Njyewe-“Wasinziye utabimbwiye uzi ko ntaramuka se?”

Lea-“Ariko se iryo tiku uramukanye ni gati ki?”

Njyewe-“Oya rata igiko! Natebyaga, nari mbuze aho mpera nkubwira ko nta mwiza wabuze inenge”

Lea-“Umwiza wabuze inenge se kandi ibyo wabirose kuri Stella nanone?”

Njyewe-“Hhhhh! Reka reka! Stella se shahu…aho kugira ngo njye murota ampata inshyi z’ amatwi nkaruhukira munsi y’ ikamyo, nasabye Imana ngo njye nirotera amashu n’ inyanya byo bimpa ikizere cy’ ejo hazaza, nzajye nirotera nawe unyereka uko abandi bishima unkurubuna ujya kunyigisha gushikura ka buruhene”

Lea-“Hhhhhh! Yewe aha! Sam! Ni ukuri sinjya nkumenyera, hanyuma se iby’ inenge wavugaga n’ ibiki?”

Njyewe-“Birarababaje ahubwo cyane”

Lea-“Bro! Wambwiye koko?”

Njyewe-“Lea! Koko? Umukobwa mwiza nkawe, uwo nzakosha jana, wantengushye pe! Uziko ntari nzi ko usinzira wasamye!”

Navuze ibyo ntebya ariko Lea yari anciyemo kabiri bitari iby’ umujinya cyangwa ubufura ahubwo nari muserereje hahandi ho guseba ukarwana no kunsekura ngo bihwaniremo.

Tumaze gushondana no guseka, twariruhukije ndetse twitsa imitima…ese buriya mwaba muzi ibyishimo bya mu gitondo? Burya ibyishimo bya mugitondo nibyo birema umunsi, nibyo bitanga amahirwe, nibyo birema ikizere, nibyo bihumuriza abaje bagusanga… ni nabyo bibyibushya uzabiremere uwo kunda buri munsi ndakubwiza ukuri ko uzaba umuhaye impano nihenze!

Nateruye isuka nyishyira ku rutugu,

Njyewe-“Lea! Reka ngende turasubira ntahanye umubyizi”

Nagize ngo ngende ariko ako kanya Lea yahise ambwira ati,

Lea-“Ariko Sam! Hari icyo nashakaga kukubwira”

Njyewe-“Mbwira ndakumva Lea”

Lea-“Hari igitecyerezo nagize, ubundi buriya ko uteruye isuka ugiye urabona uzakomeza kurwana n’ isuka kugeza ryari? Nta nubwo ubwo ushobora guha agaciro umusaruro wavuye mu muruho wawe? Ntushobora kumva ko kuri konti dufiteho amafaranga yakabaye aguranwa imvune ugiye usanga?”

Njyewe-“Ngo? Lea! Ni wowe umbwiye utyo? Aka kanya utangiye kumva ko nkwiye kugarama nkagereka akaguru…nako ngakikira inda nkibagirwa ejo hahise?”

Lea-“Oya…nyumva neza Sam! Ntabwo ari icyo nshatse kuvuga, nshatse kuvuga, rwose sinanze ko ujya gukora, ntabwo nkubujije kujya guhinga pe ariko nawe wakabaye ukora kuyo ubitse ugahaho n’ abandi nawe ukagira ibindi witaho”

Njyewe-“Ntabwo numva neza icyo ushatse kuvuga”

Lea-“Nari nshatse kuvuga ko ukwiye gushaka abakozi bahagije bajya bahinga hanyuma wenda wowe ukabahagarikira, ugomba kumenya ko ubu twabonye igishoro Atari nka mbere wihinaga mu mabumba wenyine ugataha ibyunzwe byageze kubirenge”

Njyewe-“Ibyo se…”

Lea-“Nyamara wabitecyerezaho! Buriya erega hari benshi bicaye bategereje uwabaha umurimo, ukwiye kumenya ko burya ntawifasha byose, ukarekura kugira ngo nawe wizigame ubone n’ umwanya wo gutecyereza no kwiyitaho, wasanga buriya hari ibindi wakora n’ abandi bari gukora ibyo wakabaye ukora”

Natuye isuka ntecyereza akanya gato maze mbwira Lea nti,

Njyewe-“Lea! Reka ngende ndaza kubitecyerezaho”

Nasezeye Lea manuka njya mu gishanga, ngezeyo natunguwe no gusanga abasore batatu n’ inkumi ebyiri bafite amasuka impande y’umurima, bari bari kumwe na Selemani, aho niho namenye ko baje aho baje gushaka akazi.

Nakubise agatima kubyo nari mvuye mu rugo Lea ambwiye maze mbona nta mpamvu yo kutamwumvira, burya umunsi mushya ushobora gutuma ufata ingamba cyangwa se imyanzuro mishya, nabonye ko byose biba bifite impamvu turumvikana batangira kuba abakozi…za nzozi zongera kuba impamo mba umukoresha mu buryo bwa nyabwo ntatecyerezaga.

Naratashye mbwira Lea uko byose byagenze yongera kwishimira ko nahaye agaciro inama ze, nanjye mushimira ko akomeza kurenza amaso yanjye yarebaga imbere y’ ibirenge byanjye.

Umunsi wa kane ubwo twari tuvuye gusura Mama, ubwo nari maze gushungura byose byari mu bitecyerezo byanjye nicaye hanze kuri rya buye ryabaga imbere y’ umuryango, hahandi naciye amano inshuro nyinshi Lea yasohotse mu nzu maze ndamuhamagara anyitaba kivandimwe nk’ ibisanzwe maze ndamubwira nti,

Njyewe-“Lea! Urabizi ni wowe unyumva ntaravuga, ukanshyigikira ntarashyiguka, nagize ikindi gitecyerezo”

Lea-“Mbwira ndakumva Sam!”

Njyewe-“Lea! Nakomeje gutecyereza, cyane cyane nkabikora mu rukerera ubwo igicuku kiba gihinda niko kunguka igitecyerezo, nasanze ngomba gushaka indi nzira yatwerekeza ku gasongero k’ ubuzima bw’ indoto,

Lea! Mu nzira tuva gusura Mama nongeye kwibuka uko yajyaga antoza gucuruza, nibutse uko yajyaga ambwira ko ejo n’ ejobundi ari njye nzasigara mu cyimbo cye nongera kubiha agaciro,

Lea! Ndumva inzozi ze twazigira impamo, ngafata igishoro nkajya gucuruza ku muhanda, aho kugira ngo tujye duhinga barangure tukajya duhinga twicururiza, birumvikana mu gihe bitari byera nzajya nanjye mba nshakisha aho imari iri nka ba Verena bariya”

Lea yasamiye hejuru icyo gitecyerezo arishima cyane ndetse arampobera, yambwiye byinshi byongeye kunyereka ko ubwenge butandukanye n’ ubumenyi, ko gutecyereza bidasaba imibare, yongera kunkura mu misokoro ya magambo nabwiwe na Papa ndetse na ya yandi nabwiwe na Vena yatumaga njya kwigunga impande y’ ikiraro cy’ ihene yongera kumpa ikizere cy’ ejo, yongera kunkomeza ibiganza.

Mu gitondo nazindutse kare, umwana wa mama Lea yari yazindutse kare ateka igikoma ngo ngende hari icyo nshyize mu nda, aramperekeza tunyura kuri banki tubikuza amafaranga atari menshi nerekeza ku muhanda.

Nagezeyo abo twacuruzanyaga mu kahise banyakirana amakuru menshi, abanyibutsa uburyo nabasezeye ngiye kuba umusirikare, abambazaga ibyabaye iwacu, abambazaga ukuntu nsigaye ndi umuhinzi n’ ibindi gusa muri byose…nashimishijwe nuko nsubiye aho njye na Mama twahoze.

Natangiye gushugurika iseta kubw’ amahirwe nsanga hari umwe wakoreraga ku mwanya wa mbere wavuyemo uwo munsi, negereye abayobozi b’ ishyirahamwe ry’ abakorera aho hantu nuzuza ibisabwa ubundi ndataha.

Mu gitondo cya kare nazindutse njya kureba Velena, yari yandajeho gahunda yo kujyana aho yari yabonye imari.

Nagezeyo turarangura, dupakiza amagare twerekeza ku muhanda, iseta ndayisendereza, niyemeje kutazicara n’ umunsi n’ umwe ntangira gutangira guhagarara ku muhanda mpagarika imodoka ngo zigure na twa turengushyo tw’ abacuruzi namwe muzi.

Umunsi wa gatatu nari maze kumenyera, inyungu yo yabanje kuntera ubwoba, uwo munsi rero mu masaha ya saa tanu ubwo nari mpagaze ku muhanda hari imodoka yijimye yahingutse manika ikiganza hejuru ari nako nyihagarika, ako kanya yarahagaze mbona abandi barirutse, byongeye kunyibutsa umunsi umwe nanone byabaye ibyo ubwo nahagarikaga imodoka ya Afande.

Nanjye nashatse kwiruka ariko biba bya bindi nanone, nihagararaho nitegura kwemera icyaha, urugi rwarafungutse cyane nkubita amaso Afande yicaye mu modoka, yari wa wundi wicishije bugufi wa munsi, akemera kumvugisha, akambera umukiriya ndetse akandangira inzira yanyinjiza mu muryango w’ inzozi zanjye ariko bikarangira ninaniwe.

Naramubonye numva ngize igisebo muri njye, uko nari mfite igihaza mu ntoki natinye kumwegera, ntinya gusubira inyuma ngiye kubona mbona aho yari yicaye mu modoka arandembuje………………………………….

Ntuzacikwe na Episode ya 34 yiyi nkuru “UWANDEMEWE” ku munsi w’ ejo