Nubwo inkuru y’urukundo rwabo itigeze ivugwa cyane mu itangazamakuru, abahanzi Chryso Ndasingwa na Gatete Sharon bakomeye mu muziki wo kuramya no guhimbaza Imana, bageze kure imyiteguro y’ubukwe bwabo.

Mu mpera z’Icyumweru turangije, inshuti n’abavandimwe ba Gatete Sharon bamukoreye ibirori byo gusezera ubukumi. IGIHE yamenye ko uyu mukobwa ari mu myiteguro yo kurushinga na Chryso Ndasingwa.

Nubwo nta makuru menshi y’ubukwe bwabo arajya hanze, ayo twamenye ni uko Ndasingwa na Gatete bamaze umwaka bakundana, bateganya gukora ubukwe mu Ugushyingo 2025.

Gatete usanzwe ari umuhanzi mu ndirimbo zo kuramya no guhimbaza Imana na Ndasingwa bari banaherutse guhurira mu ndirimbo zirimo ‘Yanyishyuriye’ na ‘Wera wera wera’.

Uyu mukobwa ukundirwa ijwi rye ryiza, azwi mu ndirimbo zirimo ‘Inkuru nziza’ n’izindi nyinshi zatumye yigarurira imitima y’abakunzi b’umuziki wo kuramya no guhimbaza Imana.