Abaharanira uburenganzira bw’inyamaswa mu Bubiligi bongeye kugaragaza ko batishimiye ikoreshwa ry’ubwoya bw’inyamaswa mu nganda z’imideli, bakora imyigaragambyo basaba ibigo bikomeye birimo Louis Vuitton na Dior kubihagarika burundu.

Iyi myigaragambyo yabereye mu mujyi wa Bruxelles, aho abanyamuryango ba Belgian Anti-Fur Movement (BAM) bateraniye imbere y’amaduka y’ibi birango by’imideli. Bari bafite ubutumwa busaba ko ibicuruzwa bikozwe mu bwoya bw’inyamaswa byavanwa ku isoko, bavuga ko bidakwiye gukomeza gukorwa mu gihe hari ubundi buryo bwabusimbura.

Abigaragambyaga bavuze ko bahangayikishijwe n’uburyo inyamaswa zororerwa cyangwa zifatwa hagamijwe kubona ubwoya bwifashishwa mu gukora imyambaro n’ibindi bicuruzwa by’igiciro cyo hejuru. Bemeza ko kubungabunga ubuzima n’imibereho myiza y’inyamaswa bikwiye guhabwa agaciro kurusha inyungu z’ubucuruzi.

BAM yanavuze ko ikigo cya LVMH, gifite ibirango byinshi bizwi ku rwego mpuzamahanga birimo Louis Vuitton na Dior, kigikomeje kugurisha ibicuruzwa birimo ubwoya bw’inyamaswa. Uyu muryango uvuga ko nubwo ibindi bigo bimwe na bimwe byamaze kubureka, hari ibirango bya LVMH bitarafata uwo mwanzuro.

Mu byo BAM igaragaza, harimo ko ibirango nka Louis Vuitton, Dior, Berluti, Fendi na Loro Piana bikiri mu bicuruza ibicuruzwa bikozwe mu bwoya bw’inyamaswa, ibintu bavuga ko bikwiye guhinduka mu rwego rwo kubahiriza amahame yo kurengera inyamaswa.

Iyi myigaragambyo ni kimwe mu bikorwa biri gukorwa mu bukangurambaga mpuzamahanga bugamije gusaba inganda z’imideli guhagarika gukoresha ubwoya bw’inyamaswa. Ubu bukangurambaga bukomeje no mu bindi bihugu byo ku migabane itandukanye, aho abaharanira uburenganzira bw’inyamaswa bavuga ko bazakomeza gusaba ibigo bikomeye guhitamo ibikoresho bitangiza ubuzima bw’inyamaswa.

Bavuga ko icyifuzo cyabo ari ukubona urwego rw’imideli rwimakaza uburyo burengera ibidukikije n’inyamaswa, bityo ibirango bikomeye bikagaragaza uruhare rwabyo mu guteza imbere ubucuruzi buboneye kandi bwubahiriza amahame y’uburenganzira bw’inyamaswa.