Abakozi bagera ku 3.200 bakora mu ishami rya gisirikare rya Boeing muri Leta ya Missouri na Illinois bahagaritse akazi ku wa 4 Kanama 2025 nyuma yo kutemera ibikubiye mu masezerano y’imyaka ine bahawe.

Abahagaritse akazi bibumbiye mu rugaga rwa IAM District 837. Bakora indege z’intambara za F‑15 na F/A‑18 ndetse n’ibikoresho bigize misile.

Uru rugaga rusobanura ko Boeing yavuguruye amasezerano y’aba bakozi, aho yagombaga kongera umushahara ku kigero cya 20% mu myaka ine n’agahimbazamusyi k’ibihumbi 5$ ndetse hagakorwa impinduka ku masaha y’akazi, gusa ngo ibi ntibyakozwe ku buryo bwifuzwa.

Aba bakozi basaba ko umushahara wakongerwa ku gipimo kirenze 20%, imiterere y’akazi igahindurwa, amategeko akavugururwa, ndetse bagahabwa ikiruhuko kirenzeho n’ibindi birimo agahimbazamusyi.

Imyigaragambyo yo guhagarika akazi ibaye ku nshuro ya kabiri. Ikurikiye iyabaye mu 2024.

Boeing yatangaje ko itewe agahinda n’iki cyemezo cy’abakozi, ariko igiye gushaka uburyo bwatuma akazi gakomeza mu rwego rwo kugabanya ingaruka.