Umuhanzi ukunzwe mu njyana ya Afrobeats, Asake, yatangaje ko agiye gukora ibitaramo mpuzamahanga bizazenguruka Amerika n’Uburayi, aho azataramira mu mijyi 16 itandukanye irimo Paris, London, Toronto, Atlanta na Los Angeles. Azanitabira kandi iserukiramuco rya Afro Nation riteganyijwe kubera muri Portugal.

bitaramo yabihaye izina rya “In God We Trust Tour”, aho azaba amurika album ye nshya yise “M$NEY”. Yabitangaje ku mbuga nkoranyambaga ku wa 26 Gicurasi 2026, agaragaza ko uru rugendo ruzamara amezi ane, rutangire ku wa 04 Nyakanga rukazarangira ku wa 24 Ukwakira 2026.

Muri Canada, azataramira i Laval mu Ntara ya Quebec, mu gihe muri Amerika azagera mu mijyi irimo Lowell, Miami, Houston ndetse na Colombia aho azasoreza uru rugendo. Mu Burayi ho azanyura i Bruxelles, Amsterdam n’ahandi henshi.

Album “M$NEY” azamurika muri uru ruzinduko yayishyize hanze ku wa 1 Gicurasi 2026, igizwe n’indirimbo 13. Kuri iyi album yakoranye n’abahanzi batandukanye barimo Tiakola, DJ Snake na Kabza De Small. Ni album igaragaza impinduka mu njyana ye ugereranyije n’izo yatangiriyeho.

Mu cyumweru cya mbere isohotse, “M$NEY” yumviswe inshuro zirenga miliyoni 55.98 kuri Spotify, muri zo miliyoni 37.5 zikaba zaraturutse muri Nigeria gusa. Mu Bwongereza, yaje ku mwanya wa mbere kuri Apple Music Chart, anaca agahigo ko kuba umuhanzi wa mbere muri Afurika ufite indirimbo eshanu icyarimwe ziyoboye uru rutonde.

Kugeza ubu, Asake acuruza umuziki we binyuze muri sosiyete ye bwite yise Giran Republic, ariko akanakorana na EMPIRE. Izina yahaye uru rugendo “In God We Trust” ririmo ubutumwa bwo gushimira Imana ku rugendo rwe rwavuye ku buzima bwo mu mihanda ya Lagos, ubu akaba amaze kuba icyamamare ku rwego mpuzamahanga mu myaka ine gusa.