Nubwo ikipe y’igihugu y’u Bwongereza itabashije kubona intsinzi mu mukino yanganyijemo na Ghana ubusa ku busa mu Gikombe cy’Isi cya 2026, umukinnyi wo hagati Jude Bellingham yagaragaye afite akanyamuneza nyuma y’uyu mukino.

Uyu mukino wabereye i Boston wasize bamwe mu bafana b’u Bwongereza batanyuzwe n’imikinire ndetse n’umusaruro w’ikipe yabo, ariko Bellingham we yagaragaye yisanzuye nyuma yo guhura n’umukunzi we, Ashlyn Castro, wari waje kumushyigikira.

Nyuma y’uko umukino urangiye, Ashlyn yagiye ku kibuga gusuhuza Bellingham, bombi bagaragaza ibyishimo mu buryo bwagaragaje ubucuti n’urukundo bibahuza. Byagaragaraga ko uwo mwanya wamufashije kwibagirwa gato agahinda katewe n’uko ikipe ye itabashije kubona amanota atatu.

Mu bandi bari baje gushyigikira abakinnyi b’u Bwongereza harimo Ellie Alderson, umugore wa Ollie Watkins, wari wambaye imyambaro igaragaza ubufana bwe ku ikipe y’igihugu.

Hari kandi Tolami Benson, umukunzi wa Bukayo Saka, wagaragaye yambaye ikoti ryari ryanditseho izina rya Saka ndetse na nimero akinisha.

Ku ruhande rwa Jordan Pickford, na we yagaragaye asangira ibyishimo n’umugore we Megan Pickford nyuma y’uko umukino urangiye.

Ibi byose byabaye mu gihe uwahoze ari kapiteni wa Manchester United, Roy Keane, aherutse gutanga ibitekerezo byateje impaka, aho yanenze abagore n’abakunzi b’abakinnyi bakunda kwambara imyambaro iriho amazina cyangwa nimero z’abakunzi babo mu gihe bari mu bibuga.

Ubu amaso y’abafana b’u Bwongereza ahanzwe umukino utaha bazahuramo na Panama, aho bazaba bashaka kubona intsinzi yabafasha kongera amahirwe yo gukomeza mu cyiciro gikurikira cy’irushanwa.