David Beckham wabaye Kapiteni w’Ikipe y’Umupira w’Amaguru y’u Bwongereza, yashimiwe n’Umwami Charles III wamwambitse umudali w’izina Sir kuri uyu wa Kabiri, mu muhango wabereye i Berkshire.

Sir David Beckham yahawe iri zina mu rwego rwo kumushimira kubera ibikorwa by’indashyikirwa yakoze muri ruhago no mu muryango mugari w’Abongereza.

Uyu mugabo w’imyaka 50, wakiniye amakipe arimo Machester United na Real Madrid, yakiniye igihugu cye imikino 115, anaba Kapiteni wa ‘Three Lions’ imyaka itandatu hagati ya 2000 na 2006.

Beckham yitabiriye Igikombe cy’Isi ari kumwe n’u Bwongereza inshuro eshatu mu gihe yakinnye Igikombe cy’u Burayi inshuro ebyiri.

Yazamukiye mu irerero ry’Ikipe ya Manchester United mu 1992, amara imyaka 11 mu ikipe yayo nkuru mbere yo kwerekeza muri Real Madrid mu 2003 atanzweho miliyoni 25£.

Yakiniye iyi kipe yo mu murwa mukuru wa Espagne imyaka 14, mbere yo kwerekeza muri Major League Soccer, aho yakiniye LA Galaxy.

Mu minsi yamaze i Los Angeles, Beckham yatijwe inshuro ebyiri muri Milan AC, mbere yo gusoreza ruhago mu Ikipe ya Paris Saint-Germain mu 2013.

Uyu Mwongereza wavukiye mu Burasirazuba bwa Londres, yagize uruhare mu gutuma uyu Mujyi wakira Imikino Olempike mu 2012.

Yakoranye n’Ishami ry’Umuryango w’Abibumbye ryita ku Bana (UNICEF) kuva mu 2005, ndetse mu 2015 hashyirwaho ikigega cyamwitiriwe mu rwego rwo kwizihiza imyaka 10 y’ubufatanye bw’impande zombi.

Beckham yabaye ambasaderi wa ‘King’s Foundation’ mu 2014, ashyigikira gahunda y’uburezi y’Umwami Charles III.

Kuri ubu afite imigabane mu Ikipe ya Salford City yo mu Cyiciro cya Kane mu Bwongereza, aho ayifatanyije na Gary Neville bakinanye muri Manchester United no mu Ikipe y’Igihugu y’u Bwongereza.

Ni mu gihe kandi ari muri ba nyiri Inter Miami, imwe mu makipe akina Shampiyona ya Ruhago muri Leta Zunze Ubumwe za Amerika (Major League Soccer).