Umuhanzi France Mpundu uri kubarizwa muri Afurika y’Epfo yabaye Umunyarwanda wa mbere winjiye muri ‘Secret story’, ikiganiro gitambuka kuri Canal+ gisigira uwatsinze arenga miliyoni 20 z’ama CFA (miliyoni 50Frw).

Uyu mukobwa werekeje muri Afurika y’Epfo mu minsi ishize, yinjiye mu nyubako ikinirwamo imikino igize iki kiganiro mu ijoro ryo ku wa 6 Ukwakira 2025.

Ni ku nshuro ya kabiri iki kiganiro kiri kubera muri Afurika, kuko umwaka ushize ari bwo cyatangiye ndetse gihita cyegukanwa na Awa Sanoko wo muri Côte d’Ivoire.

Muri uyu mwaka, Secret Story yitabiriwe n’abagera kuri 17 baturutse mu bihugu 15 binyuranye byo muri Afurika ikoresha ururimi rw’Igifaransa.

Ubusanzwe abatazi iki kiganiro nubwo nta wavuga ko igitekerezo cyacyo cyavuye ku cyitwaga ‘Big Brother’, ariko hari byinshi bihuje birimo no kuba gitunganywa na sosiyete ‘Banijay Entertainment S.A’ kigakorerwa mu nyubako cyaberagamo mu Mujyi wa Johannesburg.

Iki kiganiro kimara amezi atatu, gihuza abatoranyijwe mu bihugu bikoresha ururimi rw’Igifaransa, bagashyirwa hirya y’Isi isanzwe nta televiziyo cyangwa telefone bakoresha, bagahurizwa mu nzu yuzuyemo ibyuma bifata amajwi n’amashusho.

Abahatana baba bafite ibanga bagomba kuryamaho bakarihisha abo bahanganye ariko bagahangana no kuvumbura irya bagenzi babo bahatanye.

Iki kiganiro gitambuka kuri Canal+ Pop cyakomotse ku gikunzwe cyane mu Bufaransa kimaze imyaka igera kuri 18 gitambuka kuri shene za televiziyo nka TF1 na RTL Plug.