Filime nshya ya James Cameron, “Avatar: Fire and Ash”, ikomeje kwandika amateka mashya muri sinema nyuma yo kwinjiza miliyoni 450$ mu cyumweru kimwe gusa isohotse.

Muri ayo mafaranga, miliyoni 119$ yayinjije muri Leta Zunze Ubumwe za Amerika mu gihe miliyoni 331$ yakomotse ku masoko mpuzamahanga.

Ku wa Kabiri w’iki cyumweru tariki 23 Ukuboza, igice cya gatatu cya Avatar cyongeye kwinjiza miliyoni 16,5$ muri Amerika ya Ruguru na miliyoni 34,3$ mu mahanga.

Aya mafaranga yinjijwe hagati mu cyumweru agaragaza ko iyi filime ikomeje gukundwa nyuma y’uko isohotse bwa mbere, bikaba binatanga icyizere ko izitwara neza mu bihe by’iminsi mikuru, ari na byo bihe byinjiza amafaranga menshi muri sinema buri mwaka.

Biteganyijwe ko “Avatar: Fire and Ash” izakusanya hagati ya miliyoni 75$ na miliyoni 80$ mu minsi ine ya Noheli, bikayifasha kuguma ku mwanya wa mbere muri Amerika ya Ruguru.

Ibi biri kuba mu gihe izindi filime nshya eshatu zinjiye ku isoko rya sinema zirimo “Marty Supreme” ya A24 ikinwamo na Timothée Chalamet, “Song Sung Blue” ya Focus Features na “Anaconda” ya Sony. Izi zose zatangiye kwerekanwa ku wa 24 Ukuboza, bivuze ko imibare yazo izatangira gutangazwa mu minsi iri imbere.

Hagati aho, filime y’inkuru z’abana ya Disney, “Zootopia 2”, iracyari igihangange muri ibi bihe bya Noheli. Kugeza ubu imaze kwinjiza miliyari 1,3$ ku Isi hose. Hanze ya Amerika yinjije miliyoni 993$.

Iyi filime yamaze kurenza kure iyayibanjirije yasohotse mu 2016, kandi vuba izaba ibaye filime ya kabiri y’inkuru z’abana irengeje miliyari 1$ mu mahanga, ikurikira “Inside Out 2”.