Umuhanzi wo muri Tanzania, Juma Jux n’umukunzi we Priscilla Ajoke Ojo bakoze ibirori bisoza ubukwe bwabo, byitabiriwe n’ibyamamare bitandukanye birimo Diamond Platnumz, Zuchu, Navy Kenzo, Aunt Ezekiel n’abandi.

Sponsored Ad

Juma Jux uri mu bahanzi bahagaze neza muri Afurika y’Iburasirazuba, hamwe n’umukunzi we Priscilla Ajoke Ojo, bongeye guhuriza hamwe ibyamamare bitandukanye mu birori byabo bisoza ubukwe baherutse gukorera muri Nigeria.

Imihango ijyanye n’umuco no gusezerana imbere y’Imana babikoreye i Lagos muri Nigeria, ndetse ku wa 28 Gicurasi 2025, Juma Jux yakoze ibirori byo kwerekana umugeni we muri Tanzania.

Ibi birori byabere mu nzu y’imyidagaduro ya Super Dome Masaki i Dar es Salaam.

Ibyamamare bifite amazina akomeye muri Tanzania, Kenya na Nigeria ni byo byiganje mu byitabiriye ibi birori by’uyu muhanzi.

Ku ikubitiro umuhanzi Diamond Platnumz yitabiriye ibi birori dore ko ari na we wari wamubereye ‘Parrain’ mu bukwe bwe.

Icyakora uyu muhanzi yavuzweho kurenga ku mabwiriza y’imyambarire kuko yaserutse mu myenda yera itandukanye n’amabara yari yashyizweho.

Juma Jux yari yasabye abazitabira ibi birori ko bazaseruka mu myambaro y’umukara cyangwa isa na zahabu. Icyakora Diamond we yabirenzeho yambara umweru.

Mu bindi byamamare byitabiriye ibirori harimo Zuchu, Bahati wo muri Kenya, abagize itsinda rya Navy Kenzo, Rayvanny, Aunt Ezekiel, Ireno Uwoya n’abandi.

Ni mu gihe mu Rwanda abitabiriye barimo Alliah Cool hamwe n’umuhanzi Kevin Kade
.