Umuhanzi w’icyamamare muri Uganda, Moses Ssali (Bebe Cool) uzwi nka Bebe Cool, yatangaje ko yiteguye kuburana na Mutesi Jolly nyuma y’uko asabwe n’abamwunganira mu mategeko gusaba imbabazi no kwisubiraho ku byo yamushinje.

Iyi ntambara yatangiye nyuma y’uko Bebe Cool ashyize hanze ubutumwa n’amashusho y’ibiganiro byo kuri WhatsApp avuga ko yagiranye n’umuntu wamwegeraga akoresheje umwirondoro witirirwa Mutesi Jolly. Uwo muntu ngo yamugezagaho ibitekerezo by’ishoramari ndetse akanamwizeza ko ashobora kugira uruhare mu gufasha umuhungu we gutera imbere mu mupira w’amaguru.

Mu butumwa yashyize ku rubuga rwa X, Bebe Cool yavuze ko afite ibimenyetso byinshi ashaka kuzifashisha mu rukiko. Yavuze kandi ko hari andi makuru n’amajwi ateganya gushyira ahagaragara kugira ngo ashimangire ibyo avuga muri iki kibazo.

Yagaragaje ko bimwe mu bimenyetso azabigumana kugeza igihe urubanza ruzatangirira, mu gihe ibindi ashobora kubisangiza abaturage mbere y’uko ikibazo kigera imbere y’abacamanza.

Ku ruhande rwa Mutesi Jolly, abamwunganira mu mategeko bo muri Mbidde & Co. Advocates bohereje ibaruwa isaba Bebe Cool guhagarika gukwirakwiza ayo makuru no kuyahakana ku mugaragaro. Bavuze ko ibyo yatangaje bidafite gihamya ihagije kandi ko bishobora kwangiza izina n’icyubahiro by’umukiliya wabo.

Abo banyamategeko banashimangiye ko Mutesi Jolly atigeze agirana umubano cyangwa ibikorwa by’ubucuruzi na Bebe Cool. Bavuze kandi ko nimero ya telefoni iri mu zagarutsweho muri iki kibazo yari yarigeze gutangazwa mbere nk’iyakoreshejwe n’abajura bo kuri internet biyitirira abandi bantu.

Mutesi Jolly na we yakomeje guhakana uruhare urwo ari rwo rwose muri ibyo birego, avuga ko na we ubwe yigeze kuburira abantu ku bantu bakoresha amazina n’amafoto ye mu bikorwa by’uburiganya.

Abamwunganira bahaye Bebe Cool amasaha 48 yo kuba yasabye imbabazi kandi agasubirana amagambo yavuze. Naramuka atabikoze, bavuga ko bazitabaza inkiko kugira ngo ikibazo gikurikiranwe mu buryo bw’amategeko.

Mu gihe buri ruhande rukomeje kuvuga ko rufite ibimenyetso bishimangira ibyo ruvuga, birasa n’aho iyi mpaka yatangiriye ku mbuga nkoranyambaga ishobora gukomereza mu nkiko, aho hazasuzumwa ukuri kw’ibivugwa n’impande zombi.