Ikipe y’Igihugu ya Kenya yatangaje ko itazitabira irushanwa rya CECAFA riri kubera muri Tanzania, kuko bitewe n’uko ibayeho ritayorohereza kwitegura irya CHAN 2024.

Hasigaye ibyumweru bibiri gusa ngo irushanwa rihuza amakipe y’ibihugu muri Afurika ku bakinnyi bakina imbere mu bihugu [CAF African Nations Championship - CHAN 2024], ritangire gukinirwa muri Kenya, Uganda na Tanzania.

Amakipe menshi yamaze kwitegura ndetse no gutangaza abakinnyi azaryifashishamo, dore ko rizaba ari irushanwa rigiye gukinwa nyuma y’igihe risubikwa.

Mbere y’uko iri rikinwa, hari hateganyijwe irindi rushanwa ryateguwe na CECAFA riri kubera muri Tanzania guhera kuri uyu wa Mbere, tariki ya 21 kugeza 27 Nyakanga 2025.

Ni irushanwa ryatumiwemo ibihugu bine ari byo Kenya, Uganda, Tanzania na Sénégal, gusa Harambee Stars yamaze kuryikuramo kuko itabayeho neza byayorohereza kwitegura neza CHAN 2024.

Mu ibaruwa yanditswe mu gitondo cyo kuri uyu wa Mbere, Ishyirahamwe ry’Umupira w’Amaguru muri Kenya, ryagaragaje ko abatoza bayobowe na Benni McCarthy, bavuze ko uburyo ikipe ibayeho muri Tanzania “butanoze ku buryo yakina iri rushanwa”.

Nyuma yo kwandika iyi baruwa, Ikipe y’Igihugu ya Kenya irateganya guhita ifata indege ikava muri Tanzania igasubira Nairobi aho izakomeza kwitegurira irya CHAN 2024.