Rutahizamu w’ikipe y’igihugu ya Espagne, Lamine Yamal, yavuze ko u Bufaransa ari bwo bukwiriye kugira impungenge mbere y’umukino wa ½ cy’Igikombe cy’Isi uzahuza amakipe yombi ku wa Kabiri tariki 14 Nyakanga 2026.

Ibi Lamine Yamal yabitangaje nyuma y’umukino Espagne yatsinzemo u Bubiligi ibitego 2-1 mu ijoro ryo ku wa Gatanu tariki 10 Nyakanga 2026, intsinzi yahesheje Espagne kugera muri ½ cy’Igikombe cy’Isi bwa mbere kuva muri 2010.

Yagize ati "Ntekereza ko niba hari ikipe ikwiriye gutinya indi, ari u Bufaransa bukwiriye kudutinya. Ni twe twababujije gukomeza ubushize."

Lamine Yamal yakomeje agira ati "Nta kipe dutinya. Twembi turi amakipe akomeye ku rwego rw’isi, kandi kuri njye u Bufaransa ni imwe mu makipe meza cyane. Tuzareba uko bizagenda ku mukino."

Espagne yasezereye u Bufaransa muri ½ cy’Igikombe cy’u Burayi cya 2024, yongera kubutsinda no muri UEFA Nations League yabaye umwaka ushize. Muri Euro 2024 kandi, Lamine Yamal yabaye umukinnyi muto kurusha abandi watsinze igitego muri iri rushanwa.

Yamal niwe wahawe igihembo cy’umukinnyi wahize abandi mu mukino wa Espagne n’u Bubiligi.

Igitego cy’intsinzi cya Espagne cyatsinzwe na Mikel Merino winjiye mu kibuga asimbuye, ku munota wa 88 kuri Sitade SoFi. Igitego cyatsinzwe n’u Bubiligi mbere y’ikiruhuko cyabaye icya mbere Espagne itsinzwe kuva iki gikombe cyatangira, mu gihe u Bufaransa bumaze gutsinda ibitego 16 mu mikino itandatu y’Igikombe cy’Isi.

Yamal yavuze ko adahangayikishijwe no kuba imibare ye y’ibitego n’imipira yavuyemo ibitego itari hejuru, yibutsa ko no muri Euro 2024 yatsinze igitego kimwe gusa ariko atanga imipira ine yavuyemo ibitego, Espagne ikaza kwegukana igikombe.

Nubwo Espagne yatsinze imikino ibiri iheruka ya kamarampaka ku bitego byabonetse mu minota ya nyuma, Yamal yavuze ko ikipe ye yiteguye neza guhangana n’u Bufaransa, imwe mu makipe ahabwa amahirwe yo gutwara Igikombe cy’Isi.

Yagaragaje ko uburyo Espagne igumana umupira ari imwe mu ntwaro zizayifasha kuburizamo imikinire y’u Bufaransa.

U Bufaransa bumaze kugera ku mukino wa nyuma w’Igikombe cy’Isi inshuro ebyiri zikurikiranya, aho bwegukanye igikombe muri 2018. Ku rundi ruhande, Espagne yageze ku mukino wa nyuma inshuro imwe gusa, ari na bwo yegukanye igikombe muri 2010.