Liverpool yatsinzwe na Galatasaray, Real Madrid, Atletico Madrid na Bayern Munich zitsinda ibitego bitanu mu mikino y’Umunsi wa Kabiri wa UEFA Champions League wakinwe mu ijoro ryo ku wa Kabiri, tariki ya 30 Nzeri 2025.

bihugu bitandukanye hakinwe imikino y’amakipe yitwaye neza ku Mugabane w’i Burayi. Mu yari itegerejwe harimo uwa Real Madrid yo muri Espagne na Kairat Almaty wakiniwe kuri Almaty Central Stadium yo muri Kazakhstan, yarimo abafana 22,788.

Real Madrid yari nziza yatsinze ibitego bitanu harimo bitatu byinjijwe na Kylian Mbappe na ho ibindi bitsindwa na Eduardo Camavinga na Brahim Diaz buri wese watsinze igitego kimwe.

Ibi byatumye Kairat Almaty ikomeza kuba iya nyuma ku rutonde rwa UEFA Champions League, kuko yatsinzwe no mu mukino ubanza w’iri rushanwa, mu gihe Real Madrid yabaye iya kabiri.

Indi kipe yanyagiye ibitego bitanu ni Atletico Madrid yatsinze Eintracht Frankfurt ibitego 5-1. Ibitego by’iyi kipe yo muri Espagne byatsinzwe na Giacomo Raspadori, Robin Le Normand, Antoine Griezmann, Giuliano Simeone na Julian Alvarez, mu gihe Jonathan Burkardt yatsinze icy’iyi kipe yo mu Budage.

Bayern Munich yo mu Budagee na yo yatsinze Pafos FC yo muri Chypre ibitego 5-1. Harry Kane yatsinze ibitego bibiri, ibindi bishyirwamo na Raphael Guerreiro, Nicolas Jackson na Michael Olise. Ni mu gihe icya Pafos cyatsinzwe na Mislav Oršić.

Liverpool yo mu Bwongereza yatakaje umukino ku gitego 1-0 yatsinzwe na Galatasaray yo muri Turikiya. Ni igitego cyatsinzwe na Victor Osimhen ku munota wa 16 w’umukino.

Amakipe atatu kugeza ubu ni yo amaze gutsinda imikino ibiri nubwo hakiri indi mikino iteganyijwe ku wa Gatatu, tariki ya 1 Ukwakira 2025. Ayo makipe ni Bayern Munich iyoboye, Real Madrid ya kabiri na Inter Milan ya gatatu.

Uko indi mikino yakinwe yagenze

Atalanta 2-1 Club Brugge
FK Bodø/Glimt 2-2 Tottenham Hotspur
Chelsea 1-0 Benfica
Inter Milan 3-0 SK Slavia Prague
Marseille 4-0 Ajax