Analyssa Munyana uzwi cyane nka Mama Sava, ari mu bahataniye ibihembo bikomeye bya Africa Movie Academy Awards (AMAA) 2025, bitangirwa muri Nigeria.

Ahatanye mu cyiciro cya Best Actress in a Leading Role, gihembwamo umukinnyi wa filime w’umugore witwaye neza kurusha abandi mu kugira uruhare nyamukuru muri filime.

Mama Sava yahatanye binyuze muri filime “Mucoma: The Battle of the Couple” igaruka ku nkuru y’urukundo, intambara yo guhangana n’iherezo ry’umuryango, n’imbaraga z’umugore mu kubaka amahoro mu muryango usenyutse.

Mama Sava ahanganye n’abakinnyi bakomeye barimo Linda Ejiofor-Suleiman wagaragaye muri ‘The Serpent Gift’, Shaffy Bello wakinnye muri ‘The Masked King’, Danica De La Ray Jones ugaragara muri ‘Hunting Jessica Brok’, Getahun Hailu wo muri ‘For Love, For Land, For Power’, Florence Mariserena wakinnye muri ‘Small Gods’, Meriem Medjkane ugaragara muri ‘Algiers’, ndetse na Osas Ighodaro, Fat Toure na Maud Guerard bagaragara muri ‘3 Cold Dishes’.

Ibihembo bya AMAA, bizwi nka bimwe mu bikomeye mu ruganda rwa sinema muri Afurika. Byashyizweho mu gushimira no guteza imbere abahanzi n’abakora filime barimo kurushaho kuzamura urwego rwa sinema nyafurika. Bimaze imyaka 20 kuko byatangiye mu 2005. Ibihembo bizatangwa tariki 9 Ugushyingo 2025, muri Nigeria.

“Mucoma: The Battle of the Couple’’ yatumye Mama Sava ahatana muri ibi bihembo ni filime nshya yagiye hanze tariki 31 Kanama 2025. Yakiniwe muri Kigali. Iri mu Kinyarwanda ariko ifite amagambo ayisobaura mu Gifaransa no Cyongereza.

Mutiganda wa Nkunda umaze kubaka izina muri sinema mu Rwanda, akaba umwanditsi unatunganya filime ziganjemo izagiye zikundwa mu gihugu no hanze yacyo wanakoze iyi yabwiye IGIHEko igaruka cyane ku bibazo byo muri sosiyete muri rusange.

Ati “Filime igaruka cyane ku bibazo byo mu ngo biterwa no kutumvikana hagati y’abashakanye, bikabyara ingaruka nini mu gihe gito. Ni filime rero ivuga inkuru y’umugore n’umugabo baba bari muri gatanya, aho kumvikana kugabana imitungo byanga umugabo agashaka kwicisha umugore. Mu gihe rero byanze, intambara hagati yabo niho itangirira.”

Iyi filime igaragaramo Analyssa Munyana (Mama Sava) ukina ari Espérance ukina ari umugore, Lucky Murekezi ukina ari Baptiste, ukina ari umugabo, n’abavoka babo Irunga Longin akina ari Me Gasarabwe na Grace Umuhire agakina ari Me Solange n’abandi.

Iyi filime imara isaha imwe n’iminota 25.