Abahanzi batatu bo muri Nigeria, bahawe umwanya wo kuzaririmba mu mukino w’abakinnyi b’intoranywa, All Stars Game 2023 muri Shampiyona ya Basketball muri Amerika, NBA.

Sponsored Ad

NBA yashyize hanze urutonde rw’abahanzi bazasusurutsa abazitabira uyu mukino uteganyijwe kuri iki Cyumweru ku wa 19 Gashyantare 2023, barimo Burna Boy, Rema na Tems bakorera umuziki muri Nigeria.

Aba ni bamwe mu bahanzi bamaze kubaka izina birenze imbibi za Afurika nka Tems aheruka guhabwa igihembo cya Grammy Award kubera uruhare yagize mu ndirimbo ‘Wait for U’, yahuriyemo na Future na Drake.

Uyu mukobwa azwi mu ndirimbo zitandukanye nka Damages, Crazy Things, Try me n’izindi.

Muri iki gitaramo hatumiwemo Burna Boy umaze gutumbugiza umuziki wa Afurika ku ruhando mpuzamahanga, mu 2021 nawe yegukanye igihembo muri Grammy Award mu cyiciro cya ‘The Best Global Music Album’.

Uyu mugabo amaze gukora indirimbo nyinshi ubu hagezweho album yise ‘Love, Damini’ yasohoye mu 2022.

Divine Ikubor uzwi nka Rema nawe ari mu bazasusurutsa abazitabira uyu mukino. Ni umusore wavutse tariki 1 Gicurasi 2000, muri Leta ya Edo muri Nigeria.

Yamenyekanye cyane mu 2019 ubwo yasohoraga indirimbo "Iron man". Iyi ndirimbo ye yanagaragaye mu z’impeshyi Barack Obama yakundaga kumva (playlist).

Yakoze izindi nka Ginger Me", "Woman", "Peace of Mind", "Bounce", "Soundgasm" n’izindi.

Aba bahanzi bo muri Nigeria bazahurira ku rubyiniro n’ibindi byamamare muri muzika nka Post Malone, Vin Diese, Jewel na Jully Black.