Umunyamakuru Baganizi Olivier unayobora Ishya C. Troupe yambitse impeta y’urukundo umukunzi we.

Umunyamakuru wa Isango Star, Baganizi Olivier, yambitse impeta y’urukundo (Fiançailles) umukunzi we Iragena Fabiolla amuteguza kurushinga nk’umugabo n’umugore.

Ku wa 8 Nzeri 2022, ni bwo Baganizi yateye intambwe asaba umukunzi we Iragena bamaze igihe mu munyenga w’urukundo kumubera umugore w’ubuzima bwe bwose.

Ni mu birori byebereye kuri Chez Robert mu Kiyovu muri Kigali. Mu butumwa yanyujije kuri konti ye ya Facebook, Baganizi yagize ati “Gukunda ni byiza. Iyo ukunze ugukunda…. Nzagukunda none n’iteka ryose.”

Abantu batandukanye bamukurikira kuri Facebook, bagaragaje ko bishimiye intambwe yateye mu buzima bwe, bamwifuriza kurushinga rugakomera.

Mu kiganiro n’Inyarwanda Baganizi yabwiye ko hari byinshi byatumye ahitamo umukunzi we. Ati “Icya mbere akunda abantu akanezezwa no kubona bishimye, akunda Imana, azi kubana n’abandi neza kandi n’inyangamugayo.”