Umuvugabutumwa wo mu itorero rya ADEPR witwa Harerimana Steven uzwi nka Niyibeshaho ukorera umurimo we muri Paruwasi ya Nyarugenge yavuze ko kuza kwa Mwiseneza Josiane muri Miss Rwanda 2019 ari ikimenyetso cy’Imana cyo gukuraho ikinyoma mu bategura iri rushanwa.

Harerimana yabwiye IBYISHIMO.com dukesha iyi nkuru, ko urugendo rw’uyu mukobwa muri Miss Rwanda ruzaha isomo rinini abagize akanama nkemurampaka kandi ruzakuraho ikinyoma cyashinze imizi muri iri rushanwa.

Yagize ati “Uriya mukobwa nkimubona nahise mbona ko Imana hari isomo ije gutanga muri Miss Rwanda kuko nta muntu warufite kubivugaho. Hari ibintu aje kuvugurura, aje nk’isomo rinini ku bayoboye akanama nkemurampaka kandi aje gukura ikinyoma mubategura Miss Rwanda.

Nasomye ibitekerezo bigera kuri miliyoni ebyiri ku mbuga nkoranyambaga nsanga abantu bose bavuga umuntu umwe. Ibyo hari icyo byerekana […] Mu gihe Miss Josiane yaba atabaye Miss Rwanda byaba ari umuborogo mu gihugu, abantu bari barahabye kubera igikorwa cya Miss, ubu rero tubonye amahirwe yo kwerekana ko ukuri kuri muri Miss Rwanda cyangwa ntako.”

Umuvugabutumwa Harerimana Steven w’imyaka 30 yavuze ko yasengeye kandi agisengera Mwiseneza Josiane ngo azegukane ikamba rya Nyampinka w’u Rwanda kandi atariwe wenyine uri kubikora.

Yagize ati “Uriya mukobwa nashyize ivi hasi musengera kuko muri inyuma biteye ubwoba. Inshuti zanjye ziransha intege ngo ndarushywa n’ubusa,ariko bazabibona ko ntasengera ubusa.”

Mwiseneza Josiane w’imyaka 23,wavukiye mu karere ka Karongi ahitwa i Rubengera,ari kuvugwa cyane mu irushanwa rya Nyampinga w’ u Rwanda 2019 aho kuri ubu yamaze kubona itike imwerekeza mu mwiherero w’abakobwa 20 bazavamo Nyampinga w’u Rwanda.

Harerimana yatangiye amarushanwa yo gusengera Mwiseneza Josiane