Duherukana ubwo nari ndi gukomanga ku muryango w’ inzozi zanjye, nari nagiye gukora ikizamini cyo kwinjira mu gisirikare ngo nkabye inzozi zanjye.

Sponsored Ad

Ibizamiri byose barabiduhaye tugera kucyo kwandika ndadagadwa mbura uko mbigenza nandika amazina yanjye yonyine impapuro z’ ibibazo nzitanga uko zaje, njya kwicara aha njyenyine mfura utwatsi ndaduhekenya ntegereza igikurikiraho.

Cyera kabaye ifirimbi yaravuze, bari baduhamagaye ngo twegerane basome list y’ abari batsinze, nagiye mu bambere nicara mu b’ imbere ndatuza, Afande wari uyoboye abandi amanukana nabo bari bazanye kudukoresha ibizamini bafite impapuro, twese twahise tumenya ko amazina y’ abatsinze yarangijwe kwandikwa.

Twese twakomeje guceceka ntawavugaga, icyo gihe njye nari meze nk’ uwicariye intebe ishyushye, nta kindi nari ntegereje uretse kumva basomye izina ryanjye.

Ako kanya Afande wari uyoboye abandi yahagaze imbere yacu afata umwanya maze aravuga ati,

Afande-“Bite byanyu mwaruhutse mumeze neza? Ko mutavuga mwatoshetse ku buryo sauti yanze kuzamuka?”

Twese-“Yego”

Afande-“Mufite ubwoba? Ko mbona muri gutitira nimugera ku rugamba bizagenda bite?”

Twakomeje kujujura buri wese avuga ibye gusa abenshi twahurizaga ku gitima cyadundaga, nyuma y’ umwanyamuto twongeye gucecekera icyarimwe,

Afande-“Abatsinze se ubu ntimwiyizi? Abatsinze muhaguruke mwicare muri uru ruhande rw’ ibumoso, abatsinzwe mujye mu gihande cy’ iburyo, mugire vuba mu munota umwe…”

Twakomeje kwicara twese habura uhaguruka,

Afande-“Ibi n’ ibiki ra? Mwese uko muri aha nta numwe wumva ko yatsinze?”

Ako kanya hari umusore wahagurutse akurikirwa n’ abandi nka batanu, ako kanya nanjye ndahaguruka ndabakurikira twicara ukwacu.

Nyuma y’ akanya gato Afande yongeye kuvuga ati,

Afande-“Niba aba ari bo bonyine bumva ko batsinze abandi muhaguruke mwitahire!”

Twakomeje guceceka ntihagire ukoma, ku mutima narivugishaga nti iyaba koko byabaga abatahagurutse bakabategeka gutaha amahirwe akadusekera ubwo tukagenda uko turi batandatu.

Afande-“Ndabona mukomeje kunyizirikaho, ntimushaka gutaha kandi mubizi neza ko mwatsinzwe none mbagire nte?”

Twakomeje guceceka twese, Afande yongera kuvuga ati,

Afande-“Sasa rero mbere yuko nsoma urutonde rw’ abansinze ndagira ngo mbashimire kuba mwateye intambwe mukaza mu kizamini, buriya ubutwari butangirira mu bushake,

Kuba mwaje guhatanira kwinjira mu ngabo z’ igihugu bivuze byinshi, bivuze ko igihugu gifite urubyiruko rwiteguye kwitanga ngo rusigasire ubusugire bwacyo, ibyo ni umurage mwiza twishimira ko mwimitse!

Afande yakomeje avuga ati,

Afande-“Ariko kandi reka mbonereho ngaye, ndagaya bamwe muri mwe mwageragaje intege nke mu bumenyi, hari abakoze ibizamini by’ imyitozo y’ umubiri bakabitsinda ariko bagera mu kwandika bagashushanya ukibaza niba kuri ubu hari umusore cyangwa inkumi utazi kwandika? Birababaje rwose!”

Afande yavuze atyo nubika umutwe mu maboko, nahise numva ko byanga binoga ari njyewe abwira, akomeza agira ati,

Afande-“Ndagira ngo mbamenyeshe ko abaza mu ngabo z’ igihugu atari abo ubuzima bwananiye, abananiwe kwiga n’ abandi, mubyumva mute igihugu kibaye gifite injiji z’ ingabo?

Ntaho cyaba gishingiye niyo mpamvu rero abataza gukomeza uyu munsi tubashishikariza kugenda mugasubira mu mashuri mukiga mukagira ubumenyi, buriya umuntu udafite ubumenyi aba acagase, hari amahirwe menshi aba yitesha murumva neza?”

Twese-“Yego”

Afande amaze kuduhanura yahereye ku wa mbere mu batsinze arahamagara, uwo ahamagaye agahaguruka akajya kwicara hasi imbere aho twese tumubona.

Yarakomeje agera kuwa makumyabiri, uko yasomaga umwe ajya ku wundi ni nako numvaga ko ari njye utahiwe, nasubije amerwe mw’ isaho numvishe avuze ati,

Afande-“Aba nibo mirongo itanu babashije gutsinda ibizamini byose abandi mugende mukosore, aho mwatsindiwe murahazi muzagerageze amahirwe ubutaha, turumvikana?”

Muri ako kanya numvishe agahinda muri njye numva ndiyanze, kwakira ko nsigaye byabaye nko kwakira ko ntacyo ndi cyo mu byaremwe.

Mubo twari twahagurukanye mu biyumva ko twatsinze ni njye wasigaye, abandi bose koko bahamagawe ko batsinze, nongeye gusekwa n’ abandebaga aho nasigaye nicaye njyenyine urubwa rurambera.

Abari batsinze barahagurutse na morari nyinshi bararirimba bajya kurira ama modoka bagenda batyo abandi barikubura barataha aba ari njye usigara mu kibuga njyenyine.

Nabuze imbaraga zo guhaguruka, amarira azenga mu maso, nibaza ukuntu ndahinguka mu rugo kandi nasize nsezeye, nongeye kwibaza uko ndasobanura impamvu ntatsinze, ya magambo nabwiwe na Stella ndetse nayo nabwiwe na Papa yongera kungaruka mu matwi.

Butangiye kwira narihanganye ndahaguruka ndasindagira mfata inzira itaha, urwo rugendo rwambereye rurerure cyane mbabwiye ko aho nanyuraga mpibuka naba mbeshye kuko nagendaga mu nzira ndi umubiri ariko ibitecyerezo byari biri ahandi.

Cyera kabaye nageze hafi yo mu rugo, natangiye kugira ikiniga nibaza icyo ndi buvuge, nyuma y’ iminota nk’ icumi mpagaze nakomeje gutera intambwe ngera kw’ irembo nkomeza ngana mu gikari ngiye guhinguka mu rugo numva ijwi rya mu kuru wanjye Vena nikinga ku gikuta ngo numve ibyo ari kuvugana na Mama,

Vena-“Buriya ibyo ari byo byose Sam yatsinze kuko abaye atatsinze ntabwo yaba ageze aya masaha atarataha”

Mama-“Imana yabigiyemo se disi agakabya inzozi! Erega buriya uriya murumuna wanyu rwose yajyaga antera gushengurwa umutima”

Vena-“Wahora niki Mama! Nanjye buriya yajyaga ambabaza nkamuhangayikira nkibaza uko azabaho, ariko wenda ubwo yabonye amahirwe akajya mu gisirikare buriya ubuzima bwe bugiye kugira aho bushingira”

Mama-“Ahaaa! Niyigendere wenda yakira inkeke ya So, buri uko atambutse yamwukaga inabi, yagira icyo avuga akamucecekesha ngo ngaho niwe kigoryi mu muryango, yewe umwana wanjye nagende aruhukeho kabiri”

Vena-“Ariko rwose Papa nawe akwiye guhinduka akamenya ko abana bose bangana, kuba twaragize amahirwe njye na mushiki wanjye tukaba abahanga mw’ ishuri ntabwo bivuze ko twese nk’ abana turareshya hano mu rugo,

Kuba ubu mfite akazi ko kwigisha, Lea nawe akaba yarerekeje I Butare gukomeza kwiga ntabwo bivuze ko Sam utaragize ayo mahirwe akwiye gucibwa, hari ikindi ashoboye, ikindi kandi buriya ntabwo Papa yagombaga kumutererana mu mbaraga ze nke zo mu minsindire ye, yagombaga no kumushakira andi mahirwe wenda akamushakira umwuga yiga wazamubeshaho dore ni nabyo bigezweho!”

Mama-“Ahaaa! So uri hariya se ibyo arabikozwa? Reka twizere ko bamufashe mu batsinze tuzabona agarutse dushime Imana”

Uko numvaga ibyo byose ni nako nakomezaga kwitsa umutima ikiniga gikomeza kumfata, nyuma y’ akanya katari gato negamye aho nishatsemo imbaraga ntera intambwe ndinjira nkomeza mu nzu, kubw’ amahirwe ntawambonye…nakomeje mu cyumba nkingura buhoro ndinjira ndakinga.

Nicaye ku buriri muri uwo mwijima nkomeza kwibaza byinshi amaganya yuzura umutima wanjye, nari ntashye iwacu nububa nk’ umujura, ibimwaro ari byose, nongeye koko kwicuza impamvu ntabaye umuhanga nishinja kuba ari njye nyirabayazana wibujije amahirwe.

Nkiri aho hari uwakoze ku rugi ndikanga, arakingura acana itoroshi ankubise amaso arikanga cyane,

Vena-“Yeee Data! Yewe muntu!”

Njyewe-“Eeh eeh! Vuga buhoro ni njyewe Sam!”

Vena-“Sam?”

Yankesheje itoroshi mu maso koko abona ni njyewe,

Venaa-“Sam! Bite wageze hano ryari?”

Njyewe-“Mbabarira ukinge…kinga umuryango ndagusabye”

Ako kanya Vena yakinze umuryango akomeza kumbaza igihe naziye n’ impamvu naje nkinjira mu cyumba ntakomye, nanjye nca bugufi ntangira kumubwira impamvu ya byose nka mukuru wanjye wanyumvaga kenshi ntaravuga.

Maze kumubwira byose yikije umutima maze arambwira ati,

Vena-“Petit Fre! Mbabajwe cyane n’ amahirwe aguciye mu myanya y’ intoki, njye na Mama twari tuzi ko wagize amahirwe watsinze nawe wabonye intangiriro y’ ubuzima none nuko byagenze?”

Njyewe-“Erega ibyo mwavugaga byose nabyumvaga! Wivunika rwose nabyumvaga”

Nyuma y’ umwanya ducecetse Vena yarambwiye ati,

Vena-“Petit Fre! Ihangane ukomere nk’ umugabo, niba batagufashe ubyihanganire ibitari ibyawe ntabwo aba ari ibyawe, ntiwihebe hari ibyawe bigutegereje, niteguye kugufasha kandi nzakuvuganira igihe cyose nzaba nkiriho”

Mukuru wanjye Vena yambwiye ayo magambo numva andemye bundi bushya ndakomera numva ubuzima buragarutse, numvishe ari inkingi negamiye ndetse numva ko koko hari ubundi buzima, uwo munsi niwo natangiriyeho ubuzima bw’ ikizere ibyo kwiyanga no kumva ko ntashoboye mbirambika hasi nambarira kuziba icyuho cy’ akahise ……………………….

Ntuzacikwe na Episode ya 8 yiyi nkuru “UWANDEMEWE” ku munsi w’ ejo

RWIBUTSO EDDY /UMURYANGO.RW