Umunyamideli akaba n’umushoramari w’Umunya-Uganda, Zari Hassan, yongeye kuvuga ku bitekerezo by’abakunze kumunenga kubera umubare w’abagabo bagiye bavugwa mu buzima bwe bw’urukundo, agaragaza ko hari byinshi abantu badasobanukiwe ku mateka ye.

Mu butumwa yasangije abakurikira be ku mbuga nkoranyambaga, Zari yavuze ko abantu benshi bakunze kumusuzuma bashingiye gusa ku byo babona cyangwa basoma mu itangazamakuru, nyamara batamenye uko ubuzima bwe bwagenze mu by’ukuri.
Yagaragaje ko amateka ye y’urukundo akunze kugibwaho impaka cyane kurusha uko bikorwa ku bandi bantu, ashimangira ko akwiye guhabwa icyubahiro nk’umuntu wese aho guhora acirwa urubanza hashingiwe ku byo abantu bavuga.
Zari kandi yagarutse ku buryo abagore bakunze kunengwa cyane iyo ubuzima bwabo bw’urukundo bugaragaye mu ruhame, mu gihe abagabo bakora ibintu bisa na byo badahabwa igitutu nk’icyo.
Uyu mubyeyi w’abana batanu yavuze ko hari abantu benshi bafite amateka asa n’aye cyangwa ayarenze, ariko ntibamenyekane kuko batari ibyamamare. Yongeyeho ko ibyo bituma ibitekerezo byinshi bimuvugwaho bishingira ku izina afite aho gushingira ku kuri.
Mu myaka yashize, Zari yakunze kuvugwa mu nkuru z’imyidagaduro bitewe n’imibanire ye n’abagabo batandukanye bazwi. Muri bo harimo uwahoze ari umugabo we Ivan Ssemwanga witabye Imana, umuhanzi wo muri Tanzaniya Diamond Platnumz, ndetse na Shakib Cham baherutse gutandukana.
Yasoje asaba abantu kujya bashyira imbere ukuri n’icyubahiro cy’umuntu, aho kwishingikiriza ku bihuha cyangwa amakuru atuzuye mu gutanga ibitekerezo ku buzima bw’ab’abandi.