Abahagarariye rutahizamu Erling Haaland barimo Mino Raiola na se Alf Inge bagaragaye muri Espagne bagiye kuganira na Real Madrid ndetse na FC Barcelona ariko binateganyijwe ko baraza gukomereza mu Bwongereza.

Kuri uyu wa Kane, Alf Inge na Mino Raiola bafotowe bari ku kibuga cy’indege cyo mu mujyi wa FC Barcelona cyitwa El-Prat mu mujyi wa Catalonia.

Nyuma y’aho,aba bombi bivugwa ko bahise berekeza I Madrid kuganira na Real Madrid nayo yifuza uyu rutahizamu ngo aze gufatanya na Karim Benzema.Ibiganiro byabo biteganyijwe kuri uyu wa Gatanu.

Umunyamakuru ukomeye mu Butaliyani Fabrizio Romano yatangaje ko nyuma y’ibi bigugu byo muri Espagne,aba bagabo 2 barahita bajya mu Bwongereza kuganira n’amakipe 3 akomeye y’aho ariyo Manchester City,Manchester United na Chelsea.

Ikipe ya Borussia Dortmund irifuza miliyoni 154 z’amapawundi kuri uyu rutahizamu wayo w’imyaka 20 gusa uyu mwaka itamugurishije,ubutaha yahomba arenga ½ cyayo ishaka kuko yagenda kuri miliyoni 65 gusa.

Ikinyamakuru Sport cyavuze ko Raiola na Haaland mukuru bavuye ku kibuga cy’indege cya Barcelona batwawe n’uumwungiriza wa Joan Laporta uyobora FC Barcelona.

FC Barcelona ntihabwa amahirwe yo kwegukana uyu rutahizamu kuko iri mu bukene ndetse kuri ubu iri kurwana intambara ikomeye yo kongerera amasezerano Lionel Messi uhembwa akayabo.

Onda Cero ivuga ko abayobozi ba FC Barcelona baganiriye amasaha 2 n’aba bagabo 2 bahagarariye Haaland ku byerekeye kuba yakwerekea muri iyi kipe y’ubukombe.

Amakuru aravuga ko FC Barcelona ishobora kwishyura BVB miliyoni 125 z’amapawundi ndetse uyu mukinnyi arashaka umushahara w’ibihumbi 600 by’amapawundi ku cyumweru agasinya imyaka 5.Biramutse bigenze uku,Haaland yazava muri FC Barcelona ayitwaye miliyoni 300 z’amapawundi.

Haaland ni imari ishyushye ku isoko