Ikipe ya Chelsea idafite umufanyabikorwa wo kwamamaza imbere ku mupira yahawe akayabo n’urubuga rutangaza filimi z’urukozasoni kugira ngo yemere bakorane.

Uru rubuga rwa filimi z’urukozasoni rwahaye Chelsea akayabo ka miliyoni 40 z’amapawundi kugira ngo irwamamaze ku mupira imbere mu mwaka w’imikino utaha cyane ko nta mufatanyabikorwa wo kwamamaza aho hantu ifite.

Chelsea yaherukaga kwamamaza kompanyi yitwa 3 na Yokohama Tyres ariko mbere y’uko umwaka w’imikino utangira nta we barabona bakorana wamamaza ku mupira imbere.

Uru rubuga rucuruza filimi z’urukozasoni rwitwa My.Club rwahaye Chelsea akayabo kangana neza nako ziriya kompanyi ziheruka zatangaga.

Perezida wa ruriya rubuga witwa Mike Ford yabwiye The Mirror ati:"Twe hano muri My.Club turashaka gutera inkunga Chelsea kuko bashaka kuzamura urwego kurusha umwaka ushize.

Turashaka ko ikirango cya My.Club kigaragara imbere ku mupira wa Chelsea mbere y’uko umwkaa w’imikino utangira ikina na Liverpool.

Iyi mikoranire yagira akamaro ku mpande zombi.Kuri Chelsea,byabafasha gusinyisha abakinnyi beza nka Kylian [Mbappe].Ku bafana ba Chelsea baba bafite amakipe abiri bita ayabo."

Chelsea nta muterankunga wo kwamamaza ku mupira irabona ndetse hari amahirwe ko shampiyona ishobora gutangira ataraboneka.

Iyi kipe yari yaganiriye na kompanyi yitwa Allianz ariko bapfa igiciro yatangaga kuko yishyuraga miliyoni 20 z’amapawundi.

Iyi kipe kandi yahawe miliyoni 40 z’amapawundi na kompanyi ya Betting yitwa Stake.com.