Abakinnyi batandukanye b’ikipe ya Real Madrid babwiye umuyobozi wayo,Florentino Perez ko bifuza ko yarekura rutahizamu utagitanga umusaruro,Gareth Bale wokamwe n’imvune.

Aba bakinnyi babwiye Perez ko uyu mukinnyi ntacyo akibafasha ndetse asigaye afitanye amakimbirane n’abafana batakimubona nk’umukinnyi wafasha Real Madrid,mu mikino ikomeye.

Gusohoka kwa Gareth Bale muri Real Madrid kwatijwe umurindi n’ikipe ya Manchester United yifuza uyu mukinnyi ndetse iri gutanga akayabo ka miliyoni 100 z’amapawundi.

Nyuma yo kwitwara nabi mu ntangiriro za shampiyona y’uyu mwaka ndetse bagatsindwa na FC Barcelona ibitego 5-1 bikaviramo umutoza Julen Lopetegui gutsindwa,umunyamakuru wa TV El Chiringuito witwa Eduardo India,yatangaje ko abakinnyi bakomeye muri Real Madrid barimo Sergio Ramos begereye perezida Perez bamusaba ko yarekura uyu munya Wales,uri kwitwara nabi.

Abafana ba Real Madrid batangaje ko Gareth Bale ariwe mukinnyi wa kabiri nyuma ya Ramos wirukanishije umutoza Lopetegui,kuko yitwaye nabi mu buryo bwagaragariye buri wese.

Gareth Bale yageze mu ikipe ya Real Madrid mu mwaka wa 2013 avuye mu ikipe ya Tottenham Hotspurs aho yaguzwe akayabo ka miliyoni 86 z’amapawundi.

Abakinnyi ba Real Madrid barifuza ko Gareth Bale agurishwa