Ikipe ya Valencia FC yo mu kiciro cya mbere muri Espagne yamaze gutangaza ko abakozi bayo bangana na 35% bamaze kwandura icyorezo cya Covid-19 giterwa na Coronavirus gikomeje guca ibintu hirya no hino ku isi.

Valencia yavuze ko yaba abakinnyi bayo bamwe n’abakozi bayo batandukanye banduye iyi COVID-19 nyuma yo gukina na Atalanta muri UEFA Champions League.

Ku cyumweru myugariro Ezequiel Garay yatangaje ko ari mu bakinnyi 5 banduye Coronavirus we n’abandi bakinnyi 5 barimo myugariro Eliaquim Mangala.

Mu itangazo Valencia yashyize hanze,yavuze ko abakinnyi bayo n’abakozi bapimwe benshi basanganwe Covid-19 bituma bahita babashyira mu kato kugira ngo batanduza abandi ndetse n’imiryango yabo.

Valencia ni iya 7 muri La Liga ndetse yasezerewe muri 1/16 cya UEFA Champions League itsinzwe na Atalanta ibitego 8-4 mu mikino yombi.