APR FC kuri uyu wa Kane yakiriye abatoza bayo bashya, nyuma yo kugera i Kigali aho baje gutegura umwaka utaha w’imikino.

Mu gitondo cyo kuri uyu wa Kane ni bwo iyi kipe y’Ingabo z’Igihugu yerekanye Thierry Froger cyo kimwe n’umwungiriza we Karim Khouda nyuma yo kugera i Kigali.

Amafoto Nyamukandagira yashyize ku rubuga rwayo rwa Twitter yerekana aba batoza bombi bakomoka mu Bufaransa basohoka mu kibuga cy’indege cya Kigali, bari kumwe n’abayobozi b’iriya kipe bari bagiye kubakira.

Ni abayobozi bari barangajwe imbere na Masabo Michel usanzwe ari Umunyamabanga Mukuru wa APR FC.

Thierry Froger waje gutoza APR FC yanyuze mu makipe atandukanye arimo Lille y’iwabo mu Bufaransa, TP Mazembe yo muri Congo Kinshasa, USM Alger yo muri Algerie cyo kimwe na Arta Solar7 yo muri Djibouti.

Khouda uzaba amwungirije we yanyuze mu makipe atandukanye yiganjemo JS Saoura na Constantine yo muri Algerie.

APR FC nyuma ya bariya batoza biteganyijwe ko igomba no kwakira umunya-Tunisie Dr Adel Zrani uzaba ashinzwe kongerera ingufu abakinnyi utegerejwe i Kigali ku wa Gatanu.