Ishyirahamwe ry’umupira w’amaguru muri Algeria ryatangaje ko batandukanye ku mugaragaro n’umutoza mukuru Djamel Belmadi.

Algeria yaraye isezerewe mu gikombe cy’Afurika cya 2023 nyuma yo gutsindwa igitego 1-0 na Mauritania bigatuma isoza ku mwanya wa nyuma mu itsinda n’amanota 2.

Algeria imaze imikino itandatu y’igikombe cya Afurika cy’ibihugu idatsinda kuva itsinze Senegal igitego 1-0 ku mukino wa nyuma muri 2019.

Belmadi yari amaze imyaka 6 atoza Algeria ndetse akunzwe n’abafana b’iyi kipe.

Ku rundi ruhande,Jean Louis Gasset yirukanwe ku mirimo ye nk’umutoza mukuru wa Côte d’Ivoire nyuma yuko Inzovu zititwaye neza mu matsinda ya AFCON 2023.

Abakinnyi b’iyi kipe babonye amanota atatu gusa mu mikino itatu harimo uwo banyagiwe ibitego 4-0 na Guinea Equatorial.

Uwitwa Emerse Faé niwe wagizwe umutoza w’agateganyo wa Cote d’Ivoire igihe yakomeza muri iyi Afcon 2023 cyane ko RDC na Maroc zitsinze yahita ibona itike.

Mu nama yabaye kuri uyu wa gatatu tariki ya 24 Mutarama, akanama gashinzwe imyitwarire muri CAF kafashe icyemezo cyo guhana Walid Regragui.

Uyu mutoza mukuru wa Maroc yahagaritswe imikino 4 mu ikipe y’igihugu, harimo 2 yashyizwe mu muhezo mu gihe cy’umwaka umwe, kubera irondaruhu ashinjwa gukorera umukinnyi wa RDC,Chancel Mangulu Mbemba,

Hisunzwe ingingo ya 123 y’amategeko agenga imyitwarire ya CAF. Byongeye kandi, uyu mutoza wa Maroc,yaciwe ihazabu y’amadorari 5,000.