Nyuma yo gufasha Manchester United kunganya na Tottenham ibitego 2-2 muri Premier League ku Cyumweru, Umunyezamu André Onana yasanze Ikipe y’Igihugu ya Cameroun mu Gikombe cya Afurika.

Nkuko impande zombi zari zabyumvikanye,Onana yarangije uyu mukino wabereye kuri Old Trafford ahita afata indege yihuse imujyana muri Cote d’Ivoire gukina imikino y’igikombe cy’Afurika hamwe n’igihugu cye cya Cameroon.

Les Lions Indomptables iratangira CAN 2023 yesurana na Guinée kuri uyu wa Mbere saa Moya z’umugoroba.

Mu mukino wasoje iyo kuri iki cyumweru,Cap Verde yatunguye Ghana iyitsinda ibitego 2-1 mu mukino ushobora gutuma iki kigugu cyongera kuviramo mu matsinda.

Ku munota wa 17,nibwo Jovane Eduardo Borges yateye ishoti umunyezamu wa Ghana, Richard Ofori, akuramo umupira, ugarukira Jamiro Monteiro igitego cya mbere kiba kirinjiye.

Ghana yashoboraga kwishyura hakiri kare ariko igitego Ashimeru Majeed yatsinze cyanzwe n’umusifuzi Jean-Jacques Ndala nyuma yo kureba kuri VAR akemeza ko habayemo kurarira.

Ghana yishyuye iki gitego mu gice cya kabiri ku munota wa 56 giturutse kuri koruneri yatewe na Jordan Ayew,umupira usanga Aleksander Djiku ahagaze neza ahita awushyira mu izamu n’umutwe.

Nubwo Ghana ari ikipe nini,uyu mukino wayigoye bikomeye kuko Cape Verde yabonye amahirwe agera kuri enye yo gusigarana n’umunyezamu Ofori ariko ba rutahizamu barimo Bebe bakayapfusha ubusa.

Mu minota 7 yongewe kuri 90, ya nyuma y’umukino yongeweho umunani, Ghana yarangaye mu bwugarizi, Benchimol ahereza umupira Rodrigues Garry wari wenyine n’izamu, awuboneza mu rushundura, kiba igitego cya kabiri Ghana itahana agahinda.

Ghana ifite akaga gakomeye muri iri tsinda B kuko umukino ukurikiraho ifite Misiri ndetse kizigenza igenderaho Mohamed Kudus yagize ikibazo cyatumye adakina kuri iki cyumweru.

Ghana iramutse itsinzwe na Misiri yanganyije na Mozambike 2-2,ishobora guhita isezererwa mu matsinda nkuko byayigendekeye muri AFCON iheruka.

Kuri uyu wa Mbere,ibigugu birakina aho saa kumi Senegal ihura na Gambia yagowe no kubona indege ibageza Cote d’Ivoire.

Cameroon saa moya ifite Guinea Conakry ya ba Naby Keita mu gihe Algeria ikina saa yine na Angola.

Ku rundi ruhande,umufana w’umunya-Ghana afungiwe muri Côte d’Ivoire ashinjwa gushaka gusagarira umutoza Chris Hughton,nyuma yo gutsindwa na Cap Verde.

Ghana imaze imikino 5 idatsinda mu gikombe cy’Afrika(inganya 2,itsindwa 3)

Cap-Vert ntiratsindwa Umukino ufungura igikombe cy’Afrika(intsinzi 2 no kunganya 2).