Rutahizamu wa Paris Saint-Germain, Neymar Santos Júnior, yamaze kumvikana na Al-Hilal kugira ngo ayerekezamo mu gihe cy’imyaka ibiri iri imbere aho azajya ahembwa miliyoni 160 z’amayero ku mwaka.

Uyu mukinnyi w’imyaka 31 yakoze ikizamini cy’ubuzima muri iyi kipe yo muri Saudi Arabia ndetse na PSG yemeye kumurekura.

Neymar Jr yari amaze gukina imikino 497 mu makipe y’i Burayi,ayatsindira ibitego 294 ndetse anatanga imipira yavuyemo ibitego 190 mu myaka 10 yari ahamaze.

Amakuru aravuga ko yahisemo gusinyira iyi kipe imyaka ibiri kugira ngo azagaruke i Burayi yitegura igikombe cy’isi cya 2026 cya nyuma kuri we.

Amakuru avuga ko PSG irahabwa miliyoni ziri munsi ya 100 z’amayero yo kugurisha Neymar Jr.

Neymar yagiye muri PSG aguzwe amafaranga atarigeze agurwa undi mukinnyi agera kuri miliyoni 222 z’ama Euro mu 2017, ntiyakinye umukino ufungura Ligue 1.

Ntari ku rutonde rw’abakinyi umutoza Luis Enrique yifuza muri uyu mwaka w’imikino.

Neymar yahembwaga umushahara ungana na miliyoni 25 z’ama Euro buri mwaka mu Bufaransa.

Yakiniye PSG imikino 173, afasha iyo kipe gutwara ibikombe 13, harimo bitanu bya Ligue 1, no kuyigeza ku mukino wa nyuma wa Champions League mu 2020.