Ikipe ya Petro de Luanda yo muri Angola yatsinze Cape Town Tigers yo muri Afurika y’Epfo amanota 96-86, isanga Al Ahly yo muri Libya ku mukino wa nyuma wa BAL 2024 uteganyijwe ku wa Gatandatu, tariki 1 Kamena 2024, saa Kumi muri BK Arena.

Sponsored Ad

Umukino w’umwanya wa gatatu uzakinwa ku wa Gatanu, tariki 31 Gicurasi 2024, aho uzahuza Rivers Hoopers yo muri Nigeria na Cape Town Tigers saa Mbiri z’umugoroba.

Mu mukino wa mbere wa 1/2, ikipe ya Al Ahly yo muri Libya yageze ku mukino wa nyuma, itsinze Rivers Hoopers yo muri Nigeria amanota 89-83 mukino wa mbere wa ½ wabaye ku wa Gatatu, tariki 29 Gicurasi 2024 muri BK Arena.

Ku nshuro ya mbere yitabiriye BAL, iyi kipe yo muri Libya yatsinze Rivers Hoopers amanota 89-83 igera ku mukino wa nyuma.

Umukino wa kabiri wa ½ nawo wakinwe kuri uyu wa Gatatu, tariki 29 Gicurasi 2024 muri BK Arena. Ni umukino ikipe yo muri Angola yahabwaga amahirwe imbere y’iyo muri Afurika y’Epfo.

Uyu mukino watangiye ugenda gake byatumaga amanota ataba menshi bityo agace ka mbere karangira Cape Town Tigers iyoboye umukino n’amanota 16 kuri 15 ya Petro de Luanda.

Mu gace ka kabiri, umukino washyushye amakipe yombi atangira gutsindana amanota menshi ariko Petro de Luanda igaragaza ubuhanga mu gutsinda amanota 3.

Igice cya mbere cyarangiye Petro de Luanda iyoboye umukino n’amanota 43 kuri 37 ya Cape Town Tigers.

Mu gace ka gatatu, iyi kipe yo muri Afurika y’Epfo yagerageje kugabanya ikinyuranyo nubwo Petro de Luanda yakomeje kuyobora umukino n’amanota 66 kuri 55 ya Cape Town Tigers.

Iminota isanzwe y’umukino yarangiye amakipe yombi anganya amanota 77-77 bityo hashyirwaho iminota itanu y’inyongera.

Petero de Luanda yayikinnye neza birangira itsinze Cape Town Tigers yo muri Afurika y’Epfo amanota 96-86 isanga Al Ahly yo muri Libya ku mukino wa nyuma wa BAL 2024 uteganyijwe ku wa Gatandatu, tariki 1 Kamena 2024 saa Kumi muri BK Arena.