Ikjpe ya APR FC yatangiye gahunda yo kongera gukinisha abanyamahanga, yasinyishije myugariro ukomoka muri Cameroun, inongerera amasezerano Claude Niyomugabo

Kuri uyu wa Mbere nibwo ikipe ya APR FC yatangaje ko yamaze gusinyisha myugariro ukomoka muri Cameroun witwa Salomon Charles Bienvenue Banga Bindjeme w’imyaka 27.

Uyu myugariro yanyuze mu makipe atandukanye harimo ayo muri Cameroun nka Colombe Sport na Coton Sport, akinira Al-Hilal yo muri Sudani ndetse na Difaâ El Jadida yo muri Maroc.

Uyu mukinnyi Banga Bindjeme aje yiyongera kuri Apam Assongwe Bemol nawe ukomoka muri Cameroun uheruka gusinya amasezerano y’imyaka ibiri, umunya-Nigeria Victor Mbaoma w’imyaka 26 n’umunyezamu Pavelh Ndzila ukomoka muri Congo Brazaville.

APR FC kandi yasinyishije Ndikumana Danny wakinaga muri Rukinzo FC y’i Burundi, umunya-Uganda Taddeo Lwanga, Nshimirimana Ismael “Pitchou” ukomoka mu gihugu cy’u Burundi, bose bakaba barasinye amasezerano y’imyaka ibiri.

Usibye aba bakinnyi b’abanyamahanga, ikipe ya APR FC ku munsi w’ejo yatangaje ko yongereye amasezerano myugariro Niyomugabo Claude ukina inyuma ku ruhande rw’ibumoso, akiyongera kuri Mugisha Gilbert nawe uheruka kongera amasezerano.