Ikipe ya Arsenal yashimangiye umwaka mubi cyane kuko yaraye isezerewe na Villarreal muri ½ cya Europa League itsinzwe ibitego 2-1 mu mikino yombi bituma ijya mu bihe bibi byo kutazakina imikino yo ku mugabane w’I Burayi bwa mbere mu myaka 25 ishize.
Arsenal yari yatsinzwe ibitego 2-1 mu mukino ubanza wabereye muri Espagne,yasabwaga gutsinda igitego 1-0 ariko ntibyayikundiye kuko yanganyije 0-0 ihita isezererwa.
Pierre-Emerick Aubameyang wari uyoboye ubusatirizi bwa Arsenal,yateye imipira 2 (...)

Sponsored Ad

Ikipe ya Arsenal yashimangiye umwaka mubi cyane kuko yaraye isezerewe na Villarreal muri ½ cya Europa League itsinzwe ibitego 2-1 mu mikino yombi bituma ijya mu bihe bibi byo kutazakina imikino yo ku mugabane w’I Burayi bwa mbere mu myaka 25 ishize.

Arsenal yari yatsinzwe ibitego 2-1 mu mukino ubanza wabereye muri Espagne,yasabwaga gutsinda igitego 1-0 ariko ntibyayikundiye kuko yanganyije 0-0 ihita isezererwa.

Pierre-Emerick Aubameyang wari uyoboye ubusatirizi bwa Arsenal,yateye imipira 2 yakubise igiti cy’izamu bishimangira ko iyi kipe ishobora kutazitabira imikino yo ku mugabane w’I Burayi mu mwaka w’imikino utaha.

Villarreal izahura na Manchester United ku mukino wa nyuma wa Europa League nyuma y’aho iyi kipe yindi yo mu Bwongereza itsindiwe mu Butaliyani ibitego 3-2 ariko mu Bwongereza yatsinze 6-2.

Arsenal yaherukaga kutitabira imikino y’I Burayi mu mwaka wa 1995-96, mbere y’uko umunyabigwi wayo Arsene Wenger ayigeramo.

Kimwe mu byagaragaye mu mukino wa Arsenal ni intege nke z’abakinnyi bayo batigeze bashyira igitutu kuri Villarreal mu gice cya mbere ndetse ibinyamakuru byo mu Bwongereza bishimangira ko Arsenal itigeze na rimwe ikina umupira umenyerewe mu Bwongereza wo gusatira cyane ikipe bahanganye.

Benshi bakomeje kwibaza niba umutoza Arteta araguma mu ikipe nyuma yo gutsindwa cyane muri uyu mwaka w’imikino ndetse agasubiza inyuma bigaragara ikipe ya Arsenal.